Wa Sarabyin: Mara Dat Hkyamsa Ya Ai Lam Grau Galaw Lu Na Shakut Ga

Pope Francis

December 26, bat langai ya, San Pra ai Stephen a poi n'htoi shani, San Peter Shawa Pa hta, Madu a Lamu Kasa Akyu Hpyi Ga tsun ten, Wa Sarabyin Francis, mara dat hkyamsa ya ai hpe grau galaw sa wa ga, nga nna saw shaga da ai.Labau hta mung, dai ni na prat hta mung, makam masham a majaw si hkrum wa sai ni hpe kasi la na matu mung Wa Sarabyin n-gun jaw shadum da ai.

Shangai wa sai ma Yesu hpe hkalum la ai gaw January 1 ya shani du hkra Hkristmas ladaw hpe matsat (8) tup sharen da ai lam mung ndau shana da ai.Ndai matsat ya laman hta san pra ai masha nkau ni a mabyin lam yan ni hpe myit dum let shanhte hpe shagrau sha-a ai nhtoi ni nga ai: San Pra ai Stephen hpe December 26 ya shani, Chyum Laika Sara san Yawhan hpe December 27, Herod hkaw hkam shi a hkawhkam tingyang jashum kau na tsang ai majaw ma Yesu hpe sha-ang shamyit kau na yaw shada let ma law law hpe sat kau ai, dai hta lawm mat ai sasana ni poi nhtoi ni rai nga ai.

Hkristmas gaw hkawhkam langai shangai wa ai maumwi n re ai, kaja wa sha, anhte hpe n kaja ai lam hta na hkyela na Madu shangai wa ai aten rai nga ai. Tingkyen myit hpe la kau ya ai wa, mara hpe jahten kau ai wa, si du hpe dang kau ai wa rai nga ai.Kabu Gara Shiga a majaw si hkrum sai ni gaw Madu Yesu hte bung grau ai ni rai ma ai. "Martyr" makam masham a majaw sat kau hkrum ai ni gaw Madu Yesu hpe sakse hkam ai ni rai ma ai. Karai Kasang a matsan dum ai hte satan hte n hkru n kaja ai lam ni yawng hpe dawng kau lu ai ni rai ma ai.

Dai ni na prat hta mung sat kau hkrum ai ni law law rai ma ai. Masha hkum shagu shanhte a matu akyu hpyi ya na matu hte anhte hkum nan mung sakse hkam ai ni tai nga na matu, Wa Sarabyin saw shaga da ai. Anhte Kasa Laika hta, San stephen gaw Jerusalem hta dau jau magam hta lawm ai deacon marai sanit (7) hta na langai rai nga ai lam ka da ai. Shi a sakse hkam ai lam ga gasi ni hte n rai nga ai, shi a tsaw ra ai myit hte rai nga ai. Ra kadawn grau ai ni hpe daw jau lai wa ai wa rai nga ai.Dau jau ai lam hta ndai hte mi ngu ai masat jarit, shadawn shadawng n tawn da ai, shi hkrum ai masha ni yawng hpe Yesu a lam tsun hkai dan ai.

Charity San Stephen a sakse hkam ai lam gaw mara dat hkyamsa ai lam rai nga ai. Madu Yesu hpe sakse hkam ai hta kaning re ai masa hta raitim, kadai hpe mung n hkrit n agam ai, daw jau magam hte sakse hkam ai lam hpe gwi gwi galaw ai, shi hpe jeyang sat kau ai ni hpe pyi mara dat ya na matu Karai Kasang kaw hpyi nem ya ai.Anhet mung hpu nau nau na ni a ntsa san Stephen zawn mara dat ya, mai kaja lam galaw daw jau let Madu Yesu hpe sakse hkam sa wa ra ga ai.

Mara dat hkyamsa ya ai gaw tatut magam hta hpu nau nau na ni hpe daw jau ai lam langai mung rai nga ai. Karai Kasang a mungga hta sak hkrung ai lam mung rai nga ai.Dai ni na prat hta anhte shada mara dat hkyamsa ya hkat let Karai Kasang a tsaw ra matsan dum ai hpe sakse hkam sa wa ga nga nna Wa Sarabyin n-gun jaw da ai.

 

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-12/pope-francis-angelus-saint-stephen-witness-apostles-jesus.html

 

Add new comment

9 + 9 =