Wa Sarabyin: Majan Tsim-yam Hkrum Sagu Hpung Masha Ni Hte Nihtep Nga Mu

July 12, bat lahkawng ya shani, Wa Sarabyin Francis, Poland mundan hta galaw ai Ukrain Kahtawlik Saradaw ni a synod zuphpawng a matu shagun laika ka dat ai hpe, Vatican Shiga Dap kaw nna shiga jaw da ma ai.

Majan tsin-yam hkrum Ukraine hpung masha ni a ntsa yu reng bau sin makawp maga na lit nga ai hte maren, shanhte hte nihtep ai hku nga let n-gun jaw, myit mada shara jaw ga, nga nna n-gun jaw da ai lam chye lu ai.

Ukraine Saradaw ni a synod zuhpawng hpe July 7-15 lapran kaw galaw lai wa ai rai nna, mungdan kata majan byin, masa n htuk ai majaw Poland mungdan Przemysl kaw, ya na zawn synod zuphpawng hpe htawt galaw ra ai rai nga ai lam chye lu ai.

Wa Sarabyin a shagun laika gaw Ukraine mungdan Greek Kahtawlik Saradaw Hpawng kaba (UGCC) hpa-awn, Kyiv-Halych Saradaw ginwang a Saradaw kaba, Archbishop Sviatoslav Shevchuk hpe hkringdat madi ai re lam chye lu ai.

Ga hpaw hta, Ukraine mung shawa masha ni hte nihtep rau rai nga ai lam Wa Sarabyin Francis ga hpaw da ai.

2001 shaning hta, Wa Sarabyin Yawhan Pawlu (II),  Ukraine de hpung kawan hkawm ang ai shaloi, Lvie hta makam masham a majaw sat hkrum ai share shagan ni a matu Missa Hkungga nawng jau lai wa ai hpe bai tsun hkai let ya ten hta byin nga ai majan lapran Jau, Ma Ma ni hte kam sham ai hpung masha ni law law si wa nga ai lam tsun da nga ai. Soviet uphkang masa a majaw rai nga ai gaw anhte hpe asan sha mu chye shangun nga ai, ngu tsun sang lang da ai.

Synod zuphpawng a ga manoi ga baw hte seng nna mung, synod a ahkyak yaw shada ai gaw nawku hpung rawt jat galu kaba wa na hte kam sham ai masha langai hpra a matu rai ra ai; yawng hte seng ai sak prat lam hta hkawm sa lu na matu sagu hpung masha ni hte nihtep nga lu ai ladat lam ningnan ni hpe tam sagawn nna dai masa hte garum lu na matu rai ra ai, ngu shadum da ai.

Sagu hpung masha ni hpe bau sin makawp maga na matu lit ap jaw da hkrum ai ni gaw myit mada lam jaw ai sak rawng, lwi yawng nga ai hka shi hka nu zawn rai ra ai, ngu mung shadum da ai.

By Fr. Patrick Gawmaw Hkawng Yae