Wa Sarabyin: Majan Ni, Ana Zingli Dingbai Dingna ni Hpe Kaja De Galai Shai La Lu Mu Ga

image from Vatican website

November 14, bat langai ya shani, Wa Sarabyin Francis, Cardinal Juan Jose Omella Omella, Archbhishop of Barcelona, hpang de laika shangun let San Ignatius a galai shai wa ai lam tsun hkai dan let dai ni na prat a mungkan masa hpe Wenyi lam yan hta sak nga pra lu na chyeju a lam hpe mung tsun shana da nga ai.

Lai wa sai 500 ning aten na bat langai ya shani, San Ignatius, Barcelona mare kaba kaw sa du let shapan shalat ai magam gun hpai lai wa yu sai rai nga ai.

San Ignatius gaw hkawhkam a magam gun langai tai lai wa ai, raitim, hpang daw de Madu Yesu a hpang hkan tai wa ai nna, shagrit shanem ai, matsan jam jau hkam let ngai lai wa ai rai nga ai.

Shi gaw majan prat, palague ana zingli hta sak hkrung nga lai wa ai, ndai mabyin lahkawng yan a marang e, Karai Kasang gaw San Ignatius hpe galai shai myit ni byin shangun ai. Hkawhkam hpe daw jau ai prat kaw nna matsan mayan ni hpe daw jau ai, machyi makaw hkrum jam jau ai ni hpe daw jau ai. Dai masa hte Karai Kasang hpe daw jau ai.

Ndai zawn daw jau na matu Karai Kasang shaga ai hpe San Ignatius hkap la hkan shatut lai wa ai. Karai Kasang kaw na shi lu ai chyeju ni hpe shi a matu n jai lang ai sha hpu nau, nau na ni a matu jai lang ai. Shi hkam la lu ai chyeju ni gaw hpu nau, nau na ni a matu kumhpa re ngu hkam la let hpu nau nau na ni hpe daw jau sak jaw lai wa ai re lam Wa Sarabyin Francis, San Ignatius a labau hpe hkai dan da ai.

San Ignatius a wenyi lam ni, San Benedict a shagrit shanem ai lam ni, San Teresa a shingkang shingwang kaba ai daw jau dum nta ni, ndai ni yawng gaw Chyoi Pra ai Wenyi a chyeju kumhpa ni rai nga ai, nga nna mung Wa Sarabyin madi madun da ai.

Wenyi lam hta hkawm sa ai lam ni gaw kaga hpu nau ni a wenyi lam hpe mung garum ya ai; Ga Shaka Dingsa prat na Yaku a yupmang hta na, sumsing lamu hte mungkan ga htan da ai lakang zawn rai nga ai; dai gaw Yesu Madu hpe shagrit shanem ai myit hte hkan tam ai ni hpe Shi hkum nan ga sadi jaw da ai lam rai nga ai, nga nna Wa Sarabyin Francis hpang jahtum shang lang let wenyi lam hta sak hkrung hkawm sa na matu n-gun jaw saw shaga da nga ai.

 

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-11/pope-francis-letter-cardinal-omella-spain-ignatius.html

 

Add new comment

1 + 8 =