Wa Sarabyin: Majan Gaw Shinggyim Labau Hpe N Jahten Shi Yang, Ya Ya Jang Majan Hpe Jahkring Kau Da Mu Nga Nna Shadum Da Ai

Wa Sarabyin: Majan Gaw Shinggyim Labau Hpe N Jahten Shi Yang, Ya Ya Jang Majan Hpe Jahkring Kau Da Mu

  March 27, laban shani, Wa Sarabyin Francis, majan hpe ya ya jang jahkring kau mu; shing n rai yang labau hka kap mat na; majan gaw anhte a labau hta na shinggym masha ni hpe jahten shamat kau na hpe hkrit tsang ra ai, ngu shadum da nga ai. Ukraine Mungdan hta majan byin ai shata lahkawng de du shang wa nna matut manoi majan hpaw majan byin nga ai majaw Wa Sarabyin, ya na zawn shadum sadi jaw da ai hpe Vatican Shiga Dap kaw nna ndau da ma ai.

  Majan shagu gaw gumshen ai, nhkru ai, shinggyim nau na hkam sha myit n rawng ai; Ukraine mungdan hta majan byin ai shata lahkawng de matut wa nga sai; ndai gaw shinggyim masha yawng hpe jahten na lam tai wa nga ai, ngu Madu A Lamu Kasa Akyu Hpyi Ga tsun ngut ten shadum da ai.

   Wa Sarabyin gaw, zai ai hte jahten sharun ai majan hpe lawan dik jahkring kau da na matu aja awa hpyi shawn da ai rai nga ai; Majan gaw shinggyim myusha ni a shawng lam hpe mung jahten ya ai, ngu mung sadi jaw da ai.

  Ya ten du hkra rai yang, Ukraine mungdan na ma ni hta na ka-ang hkup re ai ni gaw htawt sit shanga da hkrum masai; ndai majan gaw shanhte a shawng lam myit mada shara hte anhte shinggyim masha ni yawng a myit mada shara hpe jahten kau ya nga ai; kaji htum hte mara n lu ai san seng ai ma ni a prat hta hkrit tsang hpa myit machyi hkra lam ni byin nga sai hpe dum hprang let ma ni a matu myit tau let mung majan hpe lawan dik ya ya jang jahkring da ra ai, ngu mung shadi jaw da nga ai.

 Majan gaw koi yen n lu ai baw n mai rai ai; majan hpe koi yen lu hkra galaw ra ai. Anhte hkum hpe majan hpaw na akyang hkum shatai la ga; hpawni na matu myit bang let daini byin nga ai n kaja ai lam ni hpe ya ya jang koi yen kau ga; kaja maga de galai shai sa wa ga, ngu tsun let mung masa ningbaw ningla ni hpe mung majan hpe jahtim da na matu Wa Sarabyin aja awa hpyi shawn da nga ai.

  Tinang hkum hpe garai n jahten shi yang, shinggyim labau hpe garai n jahten shi yang, majan hpe jahtim kau da ga, ngu Wa Sarabyin matut shadum da ai.

 Ram sai, majan hpe jahkring da manu; laknak nsen ni hpe shazim kau manu; simsa lam a matu ahkyak da sumru galaw sa wa saga, ngu mung shadum da ai. Kam sham ai hpung masha shagu hpe mung simsa lam a hkawhkam jan rai nga ai Kanu Nu Maria kaw akyu hpyi htinglu htinglai nga na matu saw shaga da let Wa Sarabyin, shi a mungga hpe shangut da ai.

Source; Vatican News

By Fr. Patrick Gawmaw Hkawng Yae

#vaticannews

#rvakachinservice