Wa Sarabyin: Majan Gaw Shingggyim Masha Ni A Matu Hkrat Sum Lam

Ukraine mungdan hta byin nga ai majan zim mat u ga, Nu Maria a kyu hpyi htinglu htinglai hkam la let, Karai Kasang kaw akyu hpyi na matu, March 25, bat manga ya shani hpe bai masat let kam sham ai hpung masha ni, shi hte rau akyu hpyi shang lawm ga, ngu March 23, bat masum ya, hpung shawa masha ni hte hkrum shaga ai shani, Wa Sarabyin hkum nan saw shaga da nga ai.

“Majan tsin-yam hkrum sha nga ai ni a matu aten la mayu nngai. Majan tsin-yam a majaw htawt sit nga hkawm ra ai ni, hprawng koi yen makoi hkawm nga ra ai ni, majan hta si mat ai ni, majan a majaw hkala nba hkrum nga ai ni, majan hta lawm nga ai lahkawng maga yan na hkrat sum si mat ai hpyen la hpyen num ni, ndai ni a shi ga na lu ai majaw grai yawn myit masin machyi hkam sha ru nga nngai,” nga nna hpung shawa masha ni hte hkrum shaga ai shani tsun da nga ai.

“Majan tsin-yam hta si na kaw nna Karai Kasang anhte hpe makawp maga ya u ga; Majan a majaw yawng hkrat sum wa nga ai; hpa lam hta mung hkrat sum dingyang rai nga ai; Majan hta awng dang lam ngu ai n nga ai; majan a akyu ara ngu ai n nga ai; yawng gaw majan hta hkrat sum nga ai,” ngu Wa Sarabyin shadum da ai.

Chyoi Pra ai Wenyi hpe shangun dat nna, majan gaw shinggyim masha ni hpe jahten ai sha re ai hpe dum chye shangun ya rit ga, majan hpe anhte marai hkum shagu shamyit kau lu na matu ahkyak dik ai, ngu ga hpaw let Wa Sarabyin, Karai Kasang kaw akyu hpyi da nga ai.

Majan shabyin ai lam gaw anhte hkum hpe anhte jahten la ai rai nga ai hpe Chyoi Pra ai wenyi anhte hpe chye na shangun ya rit ga; tinang hkum tinang jahten sharun ai lam kaw nna anhte hpe makawp maga bau sin ya u ga; ningbaw ningla ni a matu mung anhte ni akyu ja ja hpyi ga ai; laknak mari ai, laknak galaw shapraw ai gaw manghkang hpe hparan lu ai mahtai n re ai hpe shanhte ni dum chye nga mu ga,” ngu Wa Sarabyin akyu ja ja hpyi da nga ai.

Hpang jahtum mungga ginchyum dat ai hta, simsa lam hpe rau mahtai tam hparan sa wa ga; chyum laika tsun ai hte maren, laknak ni hpe simsa lam a matu ra ahkyak ai lam ni hta galai shai jai lang ga, ngu tsun shadum let, shi hte rau Nu Maria kaw akyu hpyi htinglu htinglai nga na matu, Wa Sarabyin Francis, kam sham ai masha yawng hpe saw shaga da nga ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-03/pope-francis-audience-appeal-peace-prayer-war-ukraine-russia.html