Wa Sarabyin: Madu Yesu Hkrung Rawt Ai Paska Gaw Mungkan Ting A Myit Mada Shara re nga tsun n gun jaw lai wa sai shiga

Wa Sarabyin Francis, San Peter Nawku Htingnu kata, Madu Yesu hkrung rawt ai Paska Laban hta Urbi et Orbi (message) hpe maning na Covid 19 tsin-yam hkrum aten na zawn sha bai hti lang da nga ai. Hkrung rawt sai Madu Yesu gaw anhte a myit mada lam hpe jahten sharun ya na n re ai lam mung tsun da nga ai.

Wa Sarabyin Francis a Paska mungga hpe live shapoi nna mungkan ting de ndau ya sai rai nga ai. Mungkan ting hta Nawku Hpung gaw kabu gara dik htum shiga hpe htawn ya nga ai. Dai gaw “Wudang hta jan noi si hkam sai Yesu Madu hkrung rawt sai” lam rai nga ai, Alleluia Shakawn ga,” ngu ai rai nga ai.

Myit Daw Gawng Run Shangun Ai Lam N Nga Ai Myit Mada Shara

Paska myit mada shara gaw kaga lam n rai nga ai; Wudang hta jan noi si hkam ai Yesu Madu hkrung rawt sai lam rai nga ai. Kawa Karai Kasang sharawt la ai rai nga ai. Hkrung rawt ai Madu gaw shinggyim hkum sa la nna anhte a n hkum n tsup gawng kya ai hte li la ai mara hpe gun la kau ya ai rai nga ai; anhte a si hkrung si htan hpe mung la kau ya ai rai nga ai. Ndai lam ni a majaw Kawa Karai Kasang Shi hpe shagrau ai rai nga ai. Yesu Hkristu gaw htani htana hkrung nga ai Karai Kasang rai nga ai.

Madu Yesu a lagaw lata garep ni hta na nma ni gaw Shi anhte hpe tsaw ra ai htani htana gring nga ai dazik dawk da ai nan rai nga ai. Myit masin hkum hkrang wenyi mahkrum madup yawng gaw anhte a matu shimlum shingbyi shara jaw ya ai rai nna myit daw gawng run shangun ai lam n nga ai myit mada lam mung jaw ya ai.

Chyam Bra Ana Zingli Hkrum Hkra Ten Ni Hta Myit Mada Lam Hte Shinggyim Masha Ni A Sai Ninghtan Rapra Lam

Hkrung rawt sai Hkristu Madu gaw chyam bra ana tsin-yam hkrum ten Machyi masha ni hte tsaw ra ai masha hpe jasum kau ai ni a matu shalan shabran n-gun jaw ya let myit mada shara mung jaw ya ai lam tsun let tsi du ni hte si sara/num ni ya na ana zingli hpe shamyit kau lu na matu mung akyu hpyi ya ai. Covid 19 makawp tsi “vaccines” hpe matsan ai mungdan ni hta garum ya na matu mung hpyi shawn da ya ai.

Hkrung rawt sai Madu gaw bungli n lu ai ni hte sut masa lam hta yak hkak taw ai ni hpe mung n-gun shalan shabran ya ai hte lam mung hpaw ya ai. Kaja wa nan ra kadawng nga ai masha ni hte kun dinghku ni hpe Madu Yesu lam madun la u ga matu akyu hpyi ya ai lam Wa Sarabyin Francis matut tsun ai.

Mungkan ga de Simsa lam gun sa ya ai myit mada shara

Wa Sarabyin Yawhan Pawlu Haiti de hpung kawan sa ai shaloi tsun da ai, “Matsan masha shagu gaw myit mada lam tawn da nna bai hpang ra ai,” ngu ai ga hte mung n-gun jaw da ai.Myanmar mungdan democracy lu wa na matu mung shawa ni, grau nna ramma ni simsa ai hku nsen shapru nga ai ni a matu akyu hpyi ya nga ai rai nga ai. “N ju n dawng ai lam hpe tsaw ra myit hte shaden kau lu na ra ai,” ngu mung akyu hpyi n-gun jaw da ai.

Syria majan a majaw Lebanon hte Jordan de sha shabyin nga ai hpyen yan ni a matu mung akyu hpyi ya ai let hkrung rawt sai Madu a nhtoi hkam la lu na myit mada lam tawn da nna nau na myit majing hte shada garum pawn ba la na matu mung saw shaga da ai.

Hkrung rawt ai lam gaw anhte hpe Yerusalem hte woi sa ai rai nna, dai shara hta anhte hpe simsa lam hte shimlam jaw ya u ga matu Madu Karai kaw akyu hpyi ga; dai shara hta anhte ni yawng gaw hpu nau ni hkrai rai ga ai hpe hkam sha na rai ga ai ngu tsun let simsa lam hte shimlum lam lu la na matu man hkrum bawngban ai a tsam hte lu la na re lam Israelis hte Palestinians ni hpe mung n-gun jaw da ai.

Lai wa sai shata na Iraq hkrunlam hpe bai myit dum let dai mungdan mung simsa lam hta hkawm sa lu mu ga matu akyu hpyi ai.

Anhte a simsa lam Madu Karai gaw majan mahkra hpe shazim lu na matu garum ya u ga matu mung akyu hpyi woi da ai. Dawsa ai lam gumshen ai lam ni a majaw n tara ai hku rim da hkrum ai ni a matu mung akyu hpyi ya ai.

Hpang jahtum mungga hta Chyoi Pra ai laban bat magam hte Paska nawku daw jau lamang ni hpe shara shagu hta yak hkak ai lam law law a lapran galaw la lu saga ai hte pat shingdang hkrum ai lam ni law law a lapran shanglawt ai kamsham myit hte nan Karai Kasang hpe nawku daw jau akyu hpyi chyeju shakawn la lu saga ai majaw Shi hpe chyeju dum nga ga ngu saw shaga let Wa Sarabyin Francis a mungga hpe jahtum da ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-04/pope-at-easter-jesus-who-was-crucified-has-risen-alleluia.html