Wa Sarabyin: Lutheran Hkristan Hpung Ni Hte Hkrum Shaga Ai Hta, “Hkristu Gaw Ginlung Kahkyin Gumding Lam De Hkawm Sa Nga Ai Anhte Hte Rau Rai Nga Ai,” Ngu Tsun Da

June 25, bat 5 ya shani, Wa Sarabyin Francis Lutheran World Federation a matu du sa ai Dakkasa ni hte hkrum shaga ai hta Lutheran Hpung masha ni hte rau Kahtawlik Nawku Hpung masha yawng hpe n-gun jaw mungga tsun da nga ai.

Ginlung Kahkyin Gumding Lam de hkawm sa nga ai Hkristan Hpung ni a lapran n hkrum n ra shi ai mayak mahkak lam nga ai raitim matut manoi hkawm sa ga ngu n-gun jaw da ai rai nga ai.

Kahtawlik hte Lutheran Nawku Hpung ni mahkri shawn ginlung kahkyin gumding lam a matu ningnan hpang wa ai gaw 1980 ning hta bai hpang wa ai rai nga ai. “Hkum Hkrang Langai Sha, Kashin Kamun Langai Sha, Karai Kasang Langai Sha” ngu ai makam hte bai mahkri shawn hpang wa ai re lam chye lu ai.

Karai Kangai Langai Hpe Sha Kam Sham Ga Ai

AD 325 shaning na Council of Nicene hta masat shagrin da ai “The Nicene Creed”  “Kasa Ni A Makam Masham” gaw Kahtawlik, Orthodox, Lutheran ni hte hpu nau Hkristan hpung law law hkap la da ai rai nga ai.

Ndai gaw anhte Hkristan ni yawng jawm kam sham ga ai makam sutgan rai nga ai; dai majaw 1700 ning hpring ladu hkrum ai masat dingsat shaning gaw 2025 shaning hta hpring sana rai nna dai masat dingsat lamang hpe galaw na matu hkyen lajang sa wa ga ngu Wa Sarabyin Francis n-gun jaw da nga ai.

Madu Hkristu A Mying Ningsang Hta Kashin Kamun Hkam La Ga Ai

Hkristan masha ni yawng gaw mara dat hkyamsa hkam la lu na matu Madu Yesu Hkristu a mying ningsang hta sha kashin kamun hkam ga ai; dai kashin kamun gaw Hkristan ni yawng hpe kahkyin gumding lam jaw ya ai.

Kashin Kamun chyeju kumla gaw Makam Masham hpung shagu a npawt makam hpang ai chyeju rai nga ai; dai chyeju sakse gaw langai sha hta ginlung kahkying gumding lam hpe lu la na lam rai nga ai. Garan ginhka ai lam ni hpe kau da, labau maka n tsawm ai lam ni hpe tsi shamai hkam la, prinem htingram lam hpe gaw de sa lu ai gaw Sakramentu chyeju kumla hta nga nga ai, ngu Wa Sarabyin sakse hkam tsun da nga ai.

Hkristan ni rau ginlung kahkyin rau akyu hpyi hpawng de ai gaw Karai Kasang jaw ya ai chyeju hte sha galaw sa lu ai rai nga ai; anhte makam hpung ni shada kanawn mazum ai zai ladat kaw na lu la ai n rai nga ai. Karai Kasang a chyeju hte sha lu galaw ga ai rai nga ai.

Karai Kasang a chyeju gaw anhte a labau maka hte masin salum ni hpe jasan jaseng ya ai, tsawm htap ai ginlung kahkyin gumding lam ningnan hpe lam madun ya ai.

Hkum Hkrang Langai hta sha jawm pawng nga ga ai

Madu Yesu a Hkum Hkrang hta jawm hpawng de nga ra ga ai. Madu Yesu a Hkum Hkrang gaw anhte a garan ginhka ai lam ni a majaw machyi nga ai.

Anhte Madu Yesu  hte ni htep ai hku nga lu na matu tinang dinghkrai sha lam tam nga ga ai majaw, anhte Hkristan ni a lapran garan ginhka lam nga nga ai majaw, anhte ni yawng mung machyi nga ga ai.

Anhte Hkristan ni kahkyin gumding lam tam nga ga ai raitim, nawku tawn langai hta sha arau nawku dau jau, rau garan gachyan lam n lu galaw ai gaw Madu Yesu a nni nkri hpe hkam sha nga ai mahkrum madup nan rai nga ai, ngu nna mung Wa Sarabyin Francis sang lang tsun dan da nga ai.

Hpang jahtum hta Lutheran Hkristan ni mung, Kahtawlik Hkristan ni mung shingtai n rai ga ai. “Hkristu Gaw Ginlung Kahkyin Gumding Lam De Hkawm Sa Nga Ai Anhte Hte Rau Rai Nga Ai,” ngu tsun n-gun jaw let “Madu Akyu Hpyi Ga” hpe rau akyu hpyi nga na matu Hkristan masha shagu hpe saw shaga da nga ai.

By Fr. Patrick Gawmaw Hkawng Yae

https://www.vaticannews.va/en/pope/news/2021-06/pope-francis-world-lutheran-federation-conflict-to-communion.html