Wa Sarabyin: Lebanon Mungdan Simsa Lam Lu La Na Matu Sasana Hpung Woi Hpa-Awn Ni, July 1 Ya Shani Akyu Hpyi Na Lam Tsun

Wa Sarabyin: Lebanon Mungdan Simsa Lam Hte Myit Mada Lam Lu La Mu Ga Matu Sasana Hpung Woi Hpa-Awn Ni, July 1 Ya Shani Akyu Hpyi Na Lam Tsun

  Wa Sarabyin Francis, 2021, July (1) ya shani, Lebanon Mungdan a matu akyu hpyi nhtoi rai u ga ngu Sasana Hpung woi Hpa-awn ni hpe ndau da ai hpe June (26), bat (6) ya shani, Vatican Shiga Dap kaw nna ndau shana da ya ma ai.

  Akyu hpyi a yaw shada lam hpe masat ai gaw Lebanon Mungdana hta shaning law law mung masa lam, sut masa lam, hte shinggyim masa lam hta mayak manghkang ni nga taw ai majaw rai nga ai. Ndai mayak manghkang ni kaw nna lawt lu nna, simsa lam hte myit mada lam bai lu la mu ga matu yaw shada let ndau da ai rai nga ai.

  Cardinal Leonardo Sandri, prefect of the Congregation for Oriental Churches, mung Wa Sarabyin masat ya ai nhtoi July (1) ya shani rau akyu hpyi ga ngu Vatican Press Office kaw nna shapraw ai Shi Laika hta bat manga ya shani ndau da ya nga ai.

  Lebanon kaw na Hkristan Hpung masha wuhpung wuhpawng ni mung, dai shani hta rau myit sumru akyu hpyi na rai ma ai. Shanhte a akyu hpyi nsen ni gaw Roma de du hkra na lu na rai nga ai. Dai majaw shanhte rau akyu hpyi let Labanon mung shawa masha ni hte rau rai nga ga, ngu Caridina matut tsun da ai.

  Vatican Secretary for Relations with States, rai nga ai Saradaw Kaba Paul Richard Gallagher mung ndai gaw mung masa lam hte seng nna myit mada lam n re ai, Sasana magam hte seng ai lam she re ai ngu tsun sang lang da ai. Matut nna mung, Wa Sarabyin Francis Lebanon de hpung kawan hkawm na lam kahtap nna tsun taw ai rai nna, mung masa mayak manghkang hpe masam maram mahtai tam lu ai hta hkan nna she dai masing hpe galaw na ra sharawng ai ngu tsun shapraw da ai. Wa Sarabyin Francis a Lebanon hkrunlam gaw ndai shaning htum wa maga de byin wa na matu myit mada ga ai raitim, du na shaning n’nan daw maga de she ang wa na masa hta nga ai ngu matut tsun shapraw da ai.

  Akyu hpyi mahkyen hpe, “Karai Kasang gaw simsa lam a matu masing ni nga ai, ai hta Lebanon mungdan mung lawm ai” ngu ai ga manoi “motto” hte rau July (1) ya shani hta akyu hpyi sa wa na re lam, akyu hpyi hpawng hpe jahpawt daw (8:30) a.m, aten, Santa Marta Nawku Jawng kaw Wa Sarabyin kawn Lebanese Hkristan wuhpung ni hte shanhte a dakkasa ni hpe hkalum la ngut ai hpang, hpang wa na re lam, garan zuphpawng masum hpe galaw ngut ai hpang shana daw hkying 6:00 P.M, aten hta Wa Sarabyin Francis kawn ginchyum dat mungga shaga la na re lam Vatican Shiga Dap kaw nna ndau da ma ai.

Source; Vatican News 

By Fr. Patrick Gawmaw Hkawng Yae

#vaticannews

#rvakachinservice