Wa Sarabyin; Lebanon Mungdan Na Hkristan Hpung Hpa-Awn Ni Hte Hkrum Shaga Na Lam

Wa Sarabyin; Lebanon Mungdan Na Hkristan Hpung Hpa-Awn Ni Hte Hkrum Shaga Na Lam

  May 30, Chyoi Pra ai Trinita Laban shani, “Madu a Lamu Kasa Akyu Hpyi” ngut ten, Wa Sarabyin Francis ndau ai lam langai galaw ai hta, du na July 1 ya shani, Vatican kaw Lebanon mungdan na Hkristan wuhpung wuhpawng ni hte hkrum shaga ai lam galaw na rai nna, dai hkrum shaga ai lamang gaw mungdan kata shata galu byin taw nga ai myit tsan shara nga ai mayak manghkang hte seng lam ai ni hpe sumru bawngban let rau akyu hpyi na lam rai nga ai.

  Lebanon mungdan simsa lam bai hkam la lu mu ga matu yaw shada let ndai lamang hpe galaw sa wa na re lam Wa Sharabyin Francis tsun shana ya let Lebanon mungdan hte mung shawa masha ni a matu mung myit dum akyu hpyi ya dat nga ai.

  “Ndai yaw shada lam hpe Harissa na Maria Lungpu hpe shagrau hkungga akyu hpyi htinglu htinglai let Karai a Kanu Nu Maria lata hta ap da nngai. Ndai ahkyen aten kaw nna dai hkrum shaga bawngban akyu hpyi ai lam hta rau shang lawm na hte de a matu shajing shachyip ai lam hta mung rau shang lawm let shawng lam hta ngwi pyaw simsa mungdan hpe gaw de sa wa ga ngu kam hpa myit hte lit shatsam hpyi shawn dat nngai, ngu Wa Sarabyin Francis hpyi shawn lit shatsam ga mung tsun dat nga ai.

  Shawng na laban hta sha “the Commission of the Bishops’ Conferences of the European Community (COMECE)” Europe Dan Ting Na Saradaw Hpawng Commission kawn mung, “European Union” Europe Dan hta lawm ai ni yawng, mung masa manghkang hte sut masa manghkang nga taw ai Lebanon mungdan na masha ni hpe garum ya na matu hpyi shawn da ya ma ai.

  Wa Sarabyin Francis, Spain mungdan na A Lu Ai Masha tang na marai masum: Maria Pilar Gullon Yturriaga, Octavia Iglesias Blanco hte Olga Pere-Monteserin Nunez ni a lam hpe mung bai tsun dan ai.

  “Ndai masum gaw myit marai atsam kaba ai myu shayi sha ni rai ma ai; shanhte gaw majan hta hkala nba hkrum ai ni hpe tawn kau da ai lam n nga ai sha, shanhte hpe yu lakawn lai wa ma ai aten makam masham hpe n dawng ai ni e sat kau hkrum ai ni rai ma ai; Sanhte a sasana magam a majaw Karai Kasang hpe shakawn ga ai; Shanhte hpe mung shakawn shagrau ga,” ngu Wa Sarabyin Francis saw shaga da nga ai.

Source; Vatican News

By Fr. Patrick Gawmaw Hkawng Yae

#vaticannews

#rvakachinservice