Wa Sarabyin: Latin American Sasana Hpung Ni Hpe Kabu Gara Sakse Hkam Na Matu N-Gun Jaw

August 13, bat 5 ya shani, Latin America hte Caribbean kaw Sasana magam gun nga ai myu shayi, myu shadang, num, la Sasana hpung ni ginlum kahkying gumding lam a matu conference bawngban hpawng galaw ai hta shang lawm ai ni hpe Wa Sarabyin Francis, hkrang mu nsen na, Video message hte n-gun jaw da nga ai hpe Vatican Shiga Dap kaw nna ndau da ma ai. N-gun jaw ga hta, buga htunghking lailen ni hpe jai lang, Kabu Gara Shiga hta ru pawt ru jung, kabu gara let sasana galaw na matu tsun da nga ai.

Tinang a sak prat hpe ap nawng let Latin America hte Caribbean hta Sasana magam gun nga ai ni bat manga ya shani kaw nna labat kru ya laban ni hta mung matu manoi rai nna masum ya tup hpawng de sa wa ma ai lam chye lu ai.

Ga baw ginlam, theme hpe gaw “Toward an Inter-congregational, Inter-cultural, and Itinerant Religious Life,” ngu ai rai nga ai. Jinghpaw hku gaw “Rau Hpawng De, HtungHking Ningli Hpe Htinglet, Sasana Magam Hta Rau Kawan Hkawm Ga” ngu ai rai nga ai.

HtungHking Ningli Htinglet, Kabu Gara Shiga Rupawt Jung

Kabu Gara Shiga Hta ru pawt madung da ai htunghking ningli ni hpe shada htinglet hkat rai nna kabu gara let sasana magam hta rau ta gindun hkawm sa na matu Wa Sarabyin Francis, hkrang mu nsen na video message hte saw shaga n-gun jaw da ai.

Htunghking lailen ni hta ginlum kahkying gumding, pawng hpawng shangun ai Karai Kasang hta kam sham ai Hkristan makam hpe hkan lang hkan shatup nna buga htunghking lailen hpe mung htinglet hkat nga ga ngu Wa Sarabyin n-gun jaw da ai.

Karai Kasang Hpe Kam Sham, Daw Jau Ai Hta Htunghking Ningli Ni Hpe Shatsawm Jahtuk, Htinglet, Pawng Hpawn Rai Jai Lang Sa Wa Lu Na Matu Htinghking Ningli Sasana Galaw Ga; Dai Sasana Magam Hta Myu Shayi, Myu Shadang, Num, La Ni Gaw Grai Ahkyak Ai, ngu mung shadum da nga ai.

“Makam masham gaw htunghking ningli hte n seng ai, kaga ga re ai ngu ai gaw teng man jaw ang ai lam gaw n rai nga ai hpe hkum malap da ga; makam masham hta ru jung ru pawt tawn let sak hkrung nga pra, htunghking lailen ni hte jiwoi jiwa ni kaw na yu hkrat wa ai htung lailen hpe mung hkungga manu shadan, dai htunghking ningli sasana hpe galaw nga ga ngu Wa Sarabyin sang lang n-gun jaw da nga ai.

Htunghking ningli ni hpe hkap la jai lang ai lam n nga, shara jaw ai n nga ai rai yang, anhte a Hkristan prat gaw moi chyaloi nhkoi aten hta hkam la lai wa ai “mungsung ga sung machye machyang lu yang hkye hkrang la lam lu sai ngu ai n hkum n tsup ai, shut shai ai lam de du mat na rai nna, mani hpa tai mat na sha rai nga ai, ngu Wa Sarabyin Francis matut sang lang shadum n-gun jaw da nga ai.

Nta mrit ana zawn re ai, moi na lam hpe sha marit maroi byin ai ana hpe tsi tsi shalawt la lu ra ai. Sak jaw ap nawng prat gaw mahkrum madup nga kung kyang ai ni ginlum kahkying gumding nga na hpe madi shadaw ya ai; hpa majaw nga yang dai sak jaw ap nawng prat hte re ai ni gaw sai rum hpu nau/ nau na myit majing hte kawan katsan hkawm lu ai, hpu nau myit ni hpe jaw bang sa lu ai rai nga ai.

Rai ti mung, Sasana wuhpung wuhpawng nkau ni, shanhte a sak hkrung lu na lam hpe madung myit mada shara shatai shut ai lam hta hkawm sa shut chye ai hpe mu lu ai majaw myit n pyaw ai lam tsun let Wa Sarabyin Francis shadi jaw da nga ai.

Hkristu Hta Kabu Awng Sharawng Nga Ai Lam

Matut nna mung, Wa Sarabyin Francis gaw, Latin America hte Caribbean Sasana hpung ni hta sasana magam gun num, la shagu gaw, nta marit ana, moi na lam hpe sha manoi nga ai ana ni gaw wenyi hpe sat ai tai ai mjaw wenyi jasum na hpe dum hprang let ninghkap gasat tawt lai, kabu awng sharawng ai hte sasana hkrun lam hta rau hkawm sa nga ga ngu shadum n-gun jaw da ai.

Karai Kasang a chyoi pra ai myusha ni hte rau rai nga mu, shanhte hpe hkungga lara di mu, sasana majan je mu, sakse ni tai nga mu; ngam ai hpe Chyoi Pra ai Wenyi a lata hta ap nawng da mu! Madu Yesu hte rau rai yang kabu awng sharawng, myit pyaw lam hpe mung jaw lu na re,” ngu mung n-gun jaw da let dai hkumzup bawngban hpawng hta lawm ai ni yawng Nu Maria hpe mada yu mu, shaloi nanhte gaw gring ai tsaw ra hpu nau myit majing rawng ai sasana magam gun shayi shadang sha ni tai nga na myit dai ngu matsun ga hte ga hpumdin da nga ai.

Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-08/pope-francis-video-message-latin-american-religious-clar.html