Wa Sarabyin: Laili Laika Hpaji Hparat Gaw Anhte Hpe Kahkyin Gumdin Ya U Ga

September 8, bat mali ya shani, Mungkan Laili Laika Hpaji kung hpan Nhtoi (World Literacy Day) hta 'Laili laika hpaji hparat gaw anhte hpe kahkyin gumdin lam jaw ya u ga, nga nna, Wa Sarabyin Francis, , the Director General of UNESCO, Audrey Azoulay hpang de, shagun laika hte hpaji jaw, n-gun jaw dat nga ai.

Grau nna, majan hte kap bra ana zingli tsin-yam hkrum nga ai ten gaw laili laika hpaji hparat gaw myit hkrum ginlum kahkyin gumding lam hpe shabyin lu ai lam tsun shadum dat ai.

Wa Sarabyin a mungga hpe Cardinal Pietro Parolin kawn, Wa Sarabyin a malai, World Literacy Day shani na lamang hta hti shana ya ai.

"Mungkan laili laika kung hpan nhtoi (International Literacy Day) lamang hte maren, masin jahkrat da ai lam ni yawng hpe sumru dinglik, bawng ban jahkrup, daw dan, galaw awng dang lu na hpe myit mada ai; kung hpan ai laili laika hpaji jai lang let kaja ai apu asi ni law law pu si lu na hpe mung myit mada ai," nga nna Wa Sarabyin shagun laika hta tsun da ai.

"Galai shai ai mabyin shagu hta laili laika hpaji hparat gaw n lawm n mai ahkyak ai lam langai rai nga ai; Masha hkum shagu a matu ahkyak ai; dai majaw hpaji hparat hte hpring ai mungkan mare hpe gaw gap ra na ga ai; dai hpaji hparat hte hpring ai mungkan mare hta anhte ni n bung hkat ai lam ni nga ga ai raitim, kahkyin gumdin let rau nga pra lu na ga ai; shinggyim matut mahkai lam hpe gyin shalat nna shinggyim hku hkau lam ni galaw lu na chyinghka hpaw da ra na ga ai" nga nna Cardinal mung, Wa Sarabyin a mungga hpe madi shadaw ai ga hpe tsun da ai.

Shinggyim wuhpawng hta, anhte a makau grupyin hta, hpu nau ni hte hku hkau kanawn mazum ai hta, htunghking lam, Wenyi lam, bawngring rawt jat lam, mung masa lam ni zawn re ai ra mara lam ni hpe gaw gap shangang shakang sa wa lu na matu 'laili laika hpaji kung kyang, kung hpan na gaw ahkyak ai lam langai rai nga ai, nga nna mung Cardinal matut shang lang da ai.

Prat hte hpaji hka ja lam hpe prat bang shagu lapran, sharin sara ni lapran, jawngma ni lapran, kun dinghku masha ni lapran, mare buga masha ni lapran, mung shawa masha ni lapran, mungkan masha ni lapran, bai ndai wuhpung langai hte langai a lapran, tinang hta rawng ai bawnu atsam, myit marai atsam madang hte hpung tang hpaji, shingni hpaji, ginsup hpaji, mung masa hpaji, sut masa hpaji, ndai lam ni yawng hpe gumhpawn jai lang let hpaji hparat hpring ai mungkan mare hpe gaw gap sa wa ra ai rai nga ai.

Ndai zawn masha shagu hta nga ai chye chyang hpaji ni hpe rau sha gumhpawn da nna jai lang ai gaw simsa rapra lam hpe gaw de sa wa lu ai; Shinggyim kun dinghku masha shada hkap tau hkap hkalum la lu ai; makam n bung ai ni shada mung man hkrum hkrum shaga lu ai, rau kanawn mazum sa wa lu ai, nga nna mung Cardinal matut tsun sang lang da ai.

Wa Sarabyin a hpang jahtum ginchyum dat mungga "laili laika hpaji hparat gaw ya na zawn majan tsin-yam hkrum, kap bra ana zingli tsin-yam hkrum ten hta myit mada lam jaw ya ai re lam tsun let, prinem htingram, mahkri shawn nna, myit hkrum kahkyin gumdin ai hpunau myit majing hpe jaw ya ai, htani htana simsa lam hpe shabyin ya lu ai, nga ai shagun laika hpe, Cardinal Secretary of State hti shana ya ai lam Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-09/pope-francis-message-world-literacy-day-unesco.html