Wa Sarabyin: Karai Kasang Myit Shalen La Ai Lam Gaw Atsam Grai Kaba Ai Shapoi La Ai Lam Nan Rai Nga Ai.

Wa Sarabyin Francis gaw, October 10, bat 6 ya shani, Dante Alighieri si ai 700 ning hpring ladu hkrum shani hta, Italy mungdan,  Saradaw Ginwang Kaba Ravenna-Cervia Archdiocese a dak kasa hpe hkrum shaga ai lam galaw lai wa ai. Archdiocese Ravenna-Cervia gaw Italy mungdan dingdung maga Emilia-Romagna mungdaw hta lawm ai rai nga ai.

Lai wa sai shaning 700 na, Dante Alighieri a “ga shagawp laika” gaw dai ni na aten hte mung seng nga ai ngu Wa Sarabyin tsun dan ai.

“Shi gaw Europe dan na htung lai prat masa hpe ja zawn manu dan ai prat hpe shadan shadawng ai Europe mung masha langai rai nga ai. Shi a ga shagawp hpe hti la lu na ahkaw ahkang nga ai, ni ai tsan ai kaw na masha kadai raitim, shi hte shi a mau hpa nsen hpe hkam sha lu na, hkap la lu na, ” ngu Wa Sarabyin shakawn shagrau da ai.

“Grau nna, shi a tsawm htap ai dai teng man ai lam rawng ai ga shagawp a shalen la ai lam gaw hpang jahtum hta Karai Kasang a shalen la ai lam hta myit shang sha ai hkam sha lam byin shangun ai”, ngu Wa Sarabyin matut hkai dan ai.

Ravenna gaw Dante hpang jahtum shanu shingbyin lai wa ai shara rai nga ai. Ga shagawp laika sara Dante gaw shi a “Divine Comedy” Karai Kasang hte seng ai kabu hpa jaw ai ga shagawp hpe dai kaw ka lai wa ai re lam chye lu ai.

Ga shagawp sara Mario Luzi gaw Dante a laklai tsawm htap ai maigan ga na mahkrum madup ga shagawp hpe tam sawk shagawn da lu ai wa re, ngu Wa Sarabyin tsun dan wa ai.

Ndai gaw Chyum Laika hta na Israel myusha ni maigan ga rai nga ai Babylon de gawt shapraw kau hkrum ai lam hta na hkam sha lam bai sumru shangun nga ai re ngu nna mung Wa Sarabyin matut tsun dan wa ai.

Maigan ga de nga ra ai shi a mahkrum madup gaw shi hte shi a labau sha n ga, num sha la sha ni a labau a ahkyak madung lachyum shalen ya nga ai ngu nna mung tsun da ai.

Dante Ravenna kaw si ai nhtoi gaw Wudang shagrau poi (the feast of the Exaltation of the Holy Cross) nhtoi hta rai nga ai.

Dante gaw 1965 shaning hta shangai ai rai nna, San Paul VI gaw shi a lup hta shakap ai ja wudang hpe alu jaw bang lai wa ai lam mung chye lu ai.

“Ndai wudang gaw ga shagawp sara Dante a lup hte n-rut n-ra ni hpe makawp maga let ya na prat hta mung matut htoi tu nga re. Dante gaw Myihtoi langai nan rai nga ai,” ngu Wa Sarabyin sakse hkam da ai.

Wa Sarabyin Francis Shi a Mungga jahtum hta San Pawlu VI a saw shaga da ai ga “N-sin chyip rai nga ai nam maling hpe lai di ai hta Karai Kasang hpe kam sham nawku daw jau let shinggyim masha ni a myit mada shara ban dung de du lu hkra ga shagawp sara, Dante a mahkrum madup hte anhte hpe garum ya nga na re,” ngu shi mu mada ai lam hpe tsun let ga hpungdin da ai hpe Vatican Shiga Dap kaw nna October 10, bat 6 ya shani ndau da ma ai.

Translated by

Fr. Patrick Gawmaw Hkawng Yae

#vaticannews

#rvakachinservice

Link

https://www.vaticannews.va/en/pope/news/2020-10/pope-francis-the-fascination-of-god-makes-its-powerful-attracti.html