Wa Sarabyin: Kanu Nu Maria Zawn, Madu Yesu A Hpang Hkan Nang Ra Ga Ai

March 28, Kungla shaman poi laban shani, San Peter pa hta, Wa Sarabyin Francis gaw Covid-19 chyam bra ana tsin-yam hkrum ten Karai Kasang a magam hte anhte a magam hpe sumru woi da nga ai.

“Anhte ni Chyoi Pra Ai Laban Bat Magam Nawku Daw Jau lamang hpang nga saga ai; Chyam bra ana tsin-yam npu e mung naw nga nga ga ai; anhte ni hkrit kajawng lai wa saga ai; daining na aten hta anhte ni grau grau shakut nga ga ai; sut masa lam hta mung yak hkak jam jau ai lam ni grai sawng wa ai,” ngu Wa Sarabyin madi madun da nga ai.

“Ndai zawn yak hkak jam jau ai masa hta Karai Kasang gaw hpa wa galaw nga ai kun?,” ngu Wa Sarabyin ga san san da ai. Bai Karai Kasang shi a ga san hpe htai ya sai re ngu nna mung matut tsun da ai. “Chyam bra ana tsin-yam hkrum ten, Yesu Madu wudang hpe shi a lahpa hta mara hpai la ai gaw, mu mada ai shi a hkum hta sha n re ai; hkum hkrang shut hpyit ai lam a matu sha n re ai; wenyi shut hpyit ai lam a matu mung wudang hpai ai rai nga ai; hpa majaw nga yang tsadan gaw ndai chyam bra ana hte kaga yak hkak ai ni hta dingbai dingna jaw na matu ahkaw ahkang la nga ai. Tsadan gaw n kam n hten ai lam ni, myit daw myit hten lam ni hte ga li ga law lam ni hpe byin shangun ai.

Maria lam madun ya ai.

Anhte gara hku bai htang ra na rai? Yesu a Kanu mung rai, shawng na sape mung rai nga ai Hkawnsek Maria anhte hpe lam madun ya nga ai. Maria gaw shi a kasha a hpang hkan nang lai wa ai.

Maria gaw shi hkam la ra ai nni nkri lam ni hpe shi hkum nan hkam la nna dai nni nkri lam hta hkawm sa let shi a makam n’htoi gintawng salum hpe shi a prat ting hta htoi tu shangun nga ai.

“Karai Kasang a chyeju hte rai yang anhte mung Nu Maria zawn dai hkrun lam hpe shabyin lu na ga ai. Anhte hkum nan shani shagu yak yak hkak hkak hpai ra ai wudang hpe hpu nau ni a lahpa hta shalai mara ya ai hku n galaw ga. Yesu a tsawra matsan dum ai myit hte ni htep ai hpu nau ni hpang sit sa wa lu na matu  anhte a masin salum hpe hpaw da ga” ngu mung tsun da ai.

Roma hpyen la ni a shadut ai hpe hkrum ai Cyrene mung na Simon zawn, Madu Yesu a wudang hpai garum ra ai shaloi, hpa majaw ngai hpe she sha-ang ma ta, ngu anhte ni san yang san na re. Dai zawn ahkaw ahkang lu ai aten gaw anhte a matu kaja ai bungli rai nna, akyu ara hkam la na kumhpa nan rai nga ai.

Makam masham lam hta galoi mung anhte a shawng hta lam woi ya ai Kanu Nu Maria garum ya u ga matu akyu hpyi ai lam, dawsa lam hkrum ai Indonesia masha ni a matu akyu hpyi ya ai lam ni galaw let shi a mungga hpe ginchyum dat da ai lam Vatican Shiga Dap kaw nna ndau da ma ai.

By Fr. Patrick Hkawng Yae

#vaticannews

#rvakachinservice

28 March 2021, 12:01

https://www.vaticannews.va/en/pope/news/2021-03/pope-at-angelus-like-mary-we-must-follow-jesus.html