Wa Sarabyin A June Shata Akyu Hpyi Yaw Shada Lam: “Kun Dinghku De Na Matu Shajin Shachyip Ai Ni A Matu Akyu Hpyi Ya Na”

“Hkungran Ta Matut Ai A Tsawm Htap Lam” ngu ai ga baw hte, June 1 ya shani, Vatican Shiga Dap kaw nna “Wa Sarabyin Francis a June shata na akyu hpyi yaw shada lam” hpe ndau shana da ma ai. June shata hta hkungran ta matut hkam la na shajin shachyip nga ai masha shagu a matu akyu hpyi ya nga ga; dai gaw masin salum kaw nna prut pru wa ai shaga la hkrum ai lam nan rai nga ai, ngu Wa Sarabyin Francis sang lang ga hte rau saw shaga da nga ai.

“Nkau ni tsun ma ai, “ramma kaba ni hkungran ta matut dinghku de n kam ma ai, grau nna, ya na zawn yak hkak jam jau hkrum nga ai aten hta hkungran ta matut kun dinghku de na n kam ma ai,” ngu ai ga gaw teng ai nga re kun?, ngu ai ga san hte Wa Sarabyin Francis ga hpaw da nga ai.

“Hkungran ta matut dinghku de ai prat hkrun lam gaw yak hkak jam jau ai lam nga na re; hkan shatup ra ai lam ni mung law dum na re; Shuk shak dum na ma ai. Raitim, hkungran ta matut dinghku de ai gaw shan shada langai hte langai a prat hta tsawm htap ai lam hpe garan gachyan ai rai nga ai,” ngu mung shadum jahprang da nga ai.

“Ndai kun dinghku prat galu hta, madu wa hte madu jan yan gaw shingtai n rai langai sha n rai ma ai; shan hte rau Yesu mung rau nga nga ai” ngu mung Yesu gaw kun dinghku de ai ni hte rau galoi mung rau anga nga ai lam tsun shadum da nga ai.

Tsawra lam de shaga la hkrum ai lam

Wa Sarabyin Francis gaw Hkungran Sakramentu Chyeju Kumla a ahkyak ai lam hpe mung sumru woi da ai. Hkungran Sakramentu Chyeju kumla gaw Nawku Hpung a prat hta daju ai rai nna, dai lam hta hkawm ai ni a prat hta mung daju nga ai.

“Hkungran dinghku de ai gaw shinggyim htung lailen langai sha n rai nga ai; dai gaw salum kaw nna prut pru wa ai shaga la hkrum ai lam mung rai nga ai; myit masin salum kaw nna daw dan ai a majaw shajin shachyip lam hpe hkan shatup ai ten kaw nna ngam ai prat ting hta hkawm sa na matu shaga la hkum ai mung rai nga ai, ngu sharin shaga let masha hkum shagu a matu Karai Kasang hkang da ai yup mang shingran nga ai, dai gaw, “tsawra” rai nga ai ngu Wa Sarabyin Francis tsun da nga ai.

Wuhpung Wuhpawng e grum shingtau lam a ahkyak ai lam

Hkungran Sakramentu hkam la na shajin shachyip nga ai ni a matu akyu hpyi ya ai gaw Hkristan wuhpung a garum shingtau magam rai nga ai rai nna shanhte a matu akyu hpyi garum ya na Kahtawlik Nawku Hpung masha ni hpe Wa Sarabyin Francis saw shaga da nga ai.

Tsawra lu na matu gaw hkam sharang ai lam nga nan nga ra ai ngu mung tsun shadum da ai. Dai majaw, kun dinghku de ai ni gaw shawang myit hte garum shingtau ai, makam ngang kang ai, hkam sharang ai myit kaba ni hte tsawra ai hta rawt jat galu kaba wa mu ga matu mung akyu hpyi da ya nga ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-06/pope-francis-june-2021-prayer-intetion-beauty-marriage.html