Wa Sarabyin: Jau Ni, Sharap Shara Lam N Nga Ai, N Jaw Ai Lam Ni Yawng Hpe Tam Sagawn, Shamyit Kau Ga

February 7, bat langai ya, Wa Sarabyin Pius XI hpe Sarabyin aya lata la ai (100) ning hpring masat dingsat nhtoi shani, Wa Sarabyin Francis, Jau ni yawng hpe shadum sadi jaw hpyi shawn dat ai lam langai galaw da ai hpe Vatican Shiga Dap kaw nna ndau da ma ai.

Urbe kaw hpaw da ai Sarabyin Rung kawn yu reng ai “Pontifical Lombard Jau Tai Dakkasu Jawng” kaw Jau ni hpe hkrum shaga ai Wa Sarabyin a mungga hta, “Jau ni gaw sharap shara ai lam n nga ai, n jaw ai yawng hpe tam shawk sagawn shamyit kau ra ai,” ngu shadum da ai.

 “Dai gaw Wa Sarabyin Pius XI kaw nna hkam la lu ai myit masa lam rai nga ai,” ngu Wa Sarabyin Francis matut sakse hkam da ai.

Jau Tai Dakkasu Jawng ni gaw San Peter a tingyang hta shara la ai ni lung lai wa ai jawng ni rai nga ai, ngu mung matut tsun da ai.

Hkum Hkrang Masat Kumla Kaba

Lai wa sai shaning (100) aten hta Sarabyin Aya lata la hkrum ai Wa Sarabyin Pius XI gaw Urbi et Orbi sharin shaga matsun laika hpe shapraw lu na matu shawng shaman hpang ai wa mung rai nga ai, ngu Wa Sarabyin Francis sakse hkam da ai. Shi a hkrang masat kumla hpe mungkan chyam hkra, Karai Kasang tsaw ra ai sak kung gumgai, dingla, sasana ma ni kaw du hkra shachyam shabra sa wa ga, ngu mung saw shaga da nga ai.

“Karai Kasang gaw mara dat hkyamsa jaw ai hta galoi pu ba myit htum ngu n nga ai,” hpe hkum malap ga,” ngu mung tsun shadum let, “anhte ni mahtang mara dat hkyamsa hpyi nem ai hta pu ba chye ga ai,” ngu Wa Sarabyin anhte hpe yin la hkam la chye shangun ga tsun da ai.

Mungkan gaw Kabu Gara Shiga Hpe Ala Dingda nga ai lam, anhte a prat hta sakse hkam sa wa ra ai lam, tsun let, Karai Kasang a Kabu Gara Shiga hpe hpang gara ai Jau ni tai nga nna mungkan jut shara shagu, htingbu ni, kun dinghku masha ni, grau nna, matsan mayan ni hte malap da hkrum ai shara ni hta nga ai ni kaw dai kabu gara shiga hpe shachya shabra sa wa ga, ngu Wa Sarabyin Jau ni yawng hpe shadum jahprang saw shaga da nga ai.

Wa Sarabyin Pius XI jahprang ya ai hkam la lam hpe, “ngai Karai Kasang hpe hpa sak jaw ra na kun?, ngu ai myit masa hte Karai Kasang hte hpu nau ni hpe daw jau nga ga, ngu mung Wa Sarabyin Francis shadum da ai.

“Kahtawlik Sasana Nawku Hpung” ngu ai gaw Kabu Gara Shiga hta sak hkrung na hte dai Kabu Gara Shiga hpe shachyam shabra na matu rai nga ai; sasana myit masin salum hpe myit sharawng awng ai hte hpaw da na matu rai nga ai, ngu shawng de tsun lai wa sai mungga hpe gunchyum dat tsun dan da ai.

Maren Mara N Re Ai Lam

Hpang jahtum daw hku nna, Wa Sarabyin Francis, maren mara n re ai a lachyum hpe tsun dan let Wa Sarabyin Pius a encyclical Quadragesimo anno “Mali Shi Ning Hpring” ga baw hte matsun sharin shaga ai lam hpe bai hti sumru shangun da ai.

Anhte a prat hta, kachyi mi sha re ai sut su masha ni hte arawng power madu lu ai ni e up sha hkrum nga ra ai gaw myit n pyaw hpa rai nga ai; anhte a lapran rap ra lam ladu lai tsan gang nga ai gaw dai ni na prat hta byin nga ai gaw teng sha rai nga ai, ngu tsun sawk sagawn tsun dan let, “Jau ni gaw dai zawn re ai rap ra lam n nga ai masa lam ni yawng hpe tam sawk sagawn shamyit kau ra ai,” ngu ginchyum dat mungga hta Wa Sarabyin Francis Jau ni yawng hpe hpyi shawn saw shaga da nga ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-02/pope-to-priests-be-eradicators-of-inequality.html