Wa Sarabyin A Iraq Mungdan Hkrum Lam Hpe Tara Shang Ndau

Sarabyin Rung Ndau Laika Htuk Shapraw Dap “The Holy See’s Press Office” kaw nna, Wa Sarabyin Francis Iraq mungdan de March 5-8 lapran “Apostolic Visit” hku sa kawan na re lam February 8 ya shani, Vatican Shiga Dap kaw nna tara shang ndau da ma ai.

March 5, bat manga ya shani Roma kaw na rawt nna, Baghdad nbungli daru hta shani ka-ang aten kaw du shang wa na.

Baghdad na “Presidential Palace” mungdan gumsan magam hkaw kata kaw Wa Sarabyin Francis hpe hkap tau hkalum ai lamang galaw ngut jang mungdan gumsam magam kaw sa gawan hkrum shaga na. Dai hpang, mungdan up hkang salang ni hte sumtsan dak kasa (members of Diplomatic Corps) ni hte mung hkrum shaga na.

March 5, bat manga ya shani hta sha, Iraq mungdan na Saradaw ni, Jau ni, Sasana hpung ni, Jau tai jawng ma ni, bai, Tarahkaw Sara ni hte gaw Baghdad kaw na Our Lady of Salvation mying ai Syro-Catholic Cathedral jawng wang kaw hkrum shaga sa wa na.

March 6, bat kru ya shani, Iraq mungdan kata na Najaf mare kaba de nbungli lam hku bai matut sa nna “the Grand Ayatollah Sayyid Ali Al-Husayami Al-Sistani” kaw tara shang sa hkrum shaga ai lam galaw na.

Dai hpang Nassirya na Ur ngu ai shara de sa du nna makam hpung law law hte hkrum shaga ai lam matut galaw na.

Ndai hkrum shaga ai lam ngut ai hpang Baghdad de bai nhtang wa nna, San Yawsep mying ai Chaldean Cathedral hta Misa Hkungga nawng jau na.

March 7, laban shani, Erbil de sa du na nna Iraqi Kurdistan salang ni hte makam hpung ni hkrum shaga na. Dai hpang Mosul de matut hkawm sa wa nna Hosh al-Bieaa (Church Square) hta majan tsin-yam hkrum masha ni a matu akyu hpyi lamang galaw na.

Dai hpang Qaraqosh de matut hkawm sa let Mara n kap na-um na-sin nawku jawng (the Church of the Immaculate Conception) hta mung shawa masha ni hte hkrum shaga na.

Shani ka-ang hpang Erbil kaw na Franso Hariri stadium hta Misa Hkungga nawng woi ngut ai hpang Baghdad de bai nhtang wa na.

Shakram lamang ngut ai hpang March 8, bat langai ya jahpawt Roma de bai nhtang wa na re lam Vatican Shiga Dap kaw nna Wa Sarabyin Francis a Iraq hkrun lam hpe ndau da ma ai.

https://www.vaticannews.va/en/pope/news/2021-02/pope-francis-programme-for-apostolic-visit-to-iraq-announced.html

Shiga  tang madun ai - Fr.Patrick