March praw 5 ya shani Vatican kaw na jahpawt 7:45 AM, aten hta nbungli hte rawt ai.

Wa Sarabyin Francis Italy kaw na Iraq hte nbungli hte hkawm sa ai shaloi, Greece, Syprus, Palestine, Israel, Jordan ni hpe lai sa wa ai rai nna mungdan langai lai shagu shakram ga tsun let dai mungdan a matu akyu hpyi ya lai wa ai lam Vatican kaw nna shi a shakram akyu hpyi ga hte rau ndau da ma ai.\

Iraq mungdan aten 2:00 PM, aten hta “Middle Eastern nation of Iraq” de du shang wa ai.

March 6, bat kru ya jahpawt daw hta Najaf kaw Iraq’s Grand Ayatollah Al-Sistani hte hkrum shaga ai. Iraq’s Grand Ayatollah Al-Sistani gaw Iraq’s Shiites na ningbaw rai nga ai. Al Sistani a lachyum gaw “rabbani” rai nna de a lachyum gaw English hku “wise Religious man” hpaji rawng rawng makam nga ai wa” ngu ai rai nga ai.

Wa Sarabyin Francis hte Iraq’s Grand Ayatollah yan a hkrum shaga ai lam gaw ni htep dik hpu nau shada hku hku hkau hkau hkrum shaga ai lam rai nga ai. Shada hkung ga ai, makam hpung ginhka ai lam n nga ai hkrum shaga ai lam rai nga ai.

Manang kaja shada tau ya ai hte magam hpe rau gun hpai ai gaw makam hpung shagu a matu ahkyak ai lam, shada hkung ga ai hte man hkrum hkrum shaga ai lam gaw Iraq mungdan a matu hte shinggyim kun dinghku shagu a matu mai kaja lam a matu rai nga ai lam Wa Sarabyin madun da nna hkrum shaga lai wa ai lam chye lu ai.

Chaldeans na Ur ngu ai shara hta nga ai Abrahamic makam hpung na dakkasa marai masum hte hte hkrum shaga ai shaloi Iraq mungdan simsa lam a matu shakut shaja na matu n-gun jaw da ai lam mung chye lu ai. Hkristan, Muslims hte Jews makam hpung yawng gaw Karai Kasang Abraham hpe shagan hte shadawn nna ga sadi jaw da ai zawn simsa ai lam hta rau nga pra sa wa na matu n-gun jaw da ai rai nga ai. Ur ngu ai shara gaw Abraham a shangai dai daw buga rai nga ai. Dai shara hta du taw ai Wa Sarabyin tinang a dum nta de bai du wa ai ngu shi a hkam sha ai lam tsun da ai.

“Ndai shara gaw Karai Kasang Abraham hpe shaga ai shara rai nga ai. Ndai shara hta Abraham shi a shaga la hkrum ai hkrun lam hpe hpang ai rai nna labau hpe shang tai ai shara rai nga ai. Anhte gaw ndai shara hta shaga la hkrum ai a apu asi ni rai ga ai. Shi anhte hpe mu nga na re,” ngu Wa Sarabyin Francis tsun ai.

Abraham yu lai wa ai shagan ni gaw htoi tu ding yang rai nga ai. Yuptung ningsing kaba dik aten hta shanhte ni gaw rau htoi tu let dai nsin hpe jahtoi ya ma ai.

Lamu gaw galung kahkying gumding lam hpe jaw ya ai. Lamu gaw anhte ni shada, htingbu shada garan ginhka lam n nga na matu shadum ya nga ai. Kaga masha ni ngu Karai Kasang tsun ai gaw anhte a kahpu kanau ni hpe tsun ai rai nga ai.

Makam masham hpung yawng gaw tsawra myit kaba ai nau na majing ni hkrai rai ga ai majaw anhte sumsing lamu de mada let Karai kasang hpe nawku nga ga ai.

Karai Kasang hpe nawku daw jau na hte htingbu wa hpe tsawra ai gaw teng man ai makam masham nan rai nga ai. Daini na mungkan hta anhte ni Karai Kasang a hkrang sumla hpe shadan shadawng na matu malap mali chye nga ga ai. Kam sham ai ni gaw nau na shada tsawra lam madun let Karai Kasang a Kawa myit jasat hpe madun let Shi a mai kaja ai lam ni hpe sakse hkam sa wa na matu saw shaga hkrum nga ga ai.

Karai Kasang gaw matsan dum lama ai wa rai nga ai. Nau na ni hpe n ju n dawng ai a marang e Karai Kasang a mying hpe n gawn n sawn di ai lam gaw dingnye lu ai. Makam masham hpung mying gang nna masha sat amu gaw teng man ai makam masham kaw na n rai nga ai.

Dawsa ai lam, majan byin ai lam, masat sat ai lam ni nga ai Iraq mungdan a matu myit n pyaw shara rai nga ai. Ndai zawn byin ai lam a majaw amyu bawsang shagu hte makam wuhpung shagu hta machyi hkam sha ra nga ma ai. Grau nna Yazidi wuphung ni hta dai machyi kaba hkrum sha lai wa ma ai majaw shanhte hpe makawp maga ai nsen hpe shapraw da ai rai nga ai.

“Shang lawt ai shinggyim myit masa hte shang lawt ahkaw ahkang lu ai makam hpe makam hpung shagu hkam la lu mu ga, makam shagu hpe manu shadan hkung ga mu ga, shanhte hpe shara shagu masha shagu e hkap la ya mu ga matu akyu hpyi ga. Ndai gaw ahkyak ai shinggyim ahkaw ahkang hte seng ai lam rai nga ai. Hpa majaw nga yang ndai ahkaw ahkang ni gaw anhte gaw gap taw ai sumsing mungdan hkam la na lam rai nga ai.”

Shagan nkau ni gaw htoi tu nga ma ai. nawku jawng ni hte muslin jawng ni hpe bai gaw gap na matu mung shawa masha law law jawm pawng galaw ai lam gaw dai shagan ni htoi tu ai hte maren rai nga ai nga nna Wa Sarabyin Francis shingdaw dan ai.

Ndai shara ni hta nawku shara ni hpe gaw gap da nga sai hte maren, dai shara ni hta sa du nawku daw jau na matu Wa Sarabyin kawn saw shaga da ya ai. Ndai shara ni gaw sumsing mungdan hpe hkrang shala madun ai tsawm htap dik ai kumla ni rai nga ai.

Abraham gaw nawku htingnu law law shara law law gaw gap da lai wa ai. Dai zawn abraham a htauli htaula myit a majaw jiwoi jiwa ni law law dai shara hta sa nna akyu la lu ma ai. Dai shara ni gaw yawng a matu simsa lam jaw ai.

Abraham Karai Kasang a ntsa ga sadi dung ai lam a marang e shinggyim masha yawng a matu shaman chyeju tai wa ai. Anhte ya nang kaw du nga ai shara ni gaw Abraham a lagaw hkang ni nga ai shara ni rai nga ai. Dai gaw Iraq mungdan a matu hte mungkan ting a matu chyeju rai nna, myit mada shara mung rai nga ai. Karai Kasang anhte Abraham a kashu kasha ni yawng hpe tsawra ai.

Abraham, lamu de mada let, mungkan hkrun lam hta hkawm sa ai hkrum lam gaw shi a aru arat ni hpe aten shagu shara shagu lam woi ya nga ai. Anhte a Jiwoi Jiwa ni a hkrun lam hta ap nawng daw jau ai lam ni mung lawm nga ai. Dai gaw anhte shada da ra kadawn ai hpe madun ai.

Anhte a hpyen gaw n ju n dawng ai lam rai nga ai. Dai n ju n dawng ai lam hpe gasat shamyit kau ga. Abraham makam hpung dakkasa masum hte rau shawa masha ni yawng gaw gawng a kawa rai nga ai Abraham a kasi hpe tam la nna simsa lam gaw de ai ni tai nga na matu n-gun jaw da ai hpe Vatican Shiga Dap kaw nna ndau da ma ai.

Translated by Fr. Patrick Gawmaw Hkawng Yae

Source : Vaitcan News