Wa Sarabyin: Hkristan Magam Gun Ni Gaw Nawku Hpung Wuhpawng Ni Hta Tinang Dum Nta Zawn Hkam Sha Ra Ai

December 9, bat manga ya shani, Wa Sarabyin Francis, Hkristan Magam Gun (Christian Workers) ni hte hkrum zup ai shaloi, Hkristan magam gun ni gaw Nawku Hpung wuhpawng ni hta tinang dum nta zawn hkam sha ra ai, nga nna shadum jahprang da ai.

"Tinang tinghkrai galaw ai hta pyaw len nga n mai ai; Chyoi Pra ai Wenyi gaw masha hkum shagu a prat labau hta bungli galaw nga ai hpe dum hprang ra ai, hkum hkrang hkam sha lam hta n re, shagrit shanem ai hte shani shagu masha shagu hte rau rai nga ai hpe dum hprang ra ai," nga nna Wa Sarabyin Francis shadum da ai.

Anhte yawng gaw mara lu ai ni rai ga ai hte maren Karai Kasang a matsan dum lama ai hte mara dat hkyam sa ya na hpe ra kadawn ai ni rai ga ai. Dai majaw shawng n'nan anhte hkum hpe jasan jaseng hkam la ra ga ai, nga nna mung shadum da ai.

Tinang a gawng kya shut hpyi ai mara ni hpe hpaw malang, myit malai lu galai shai lam de hkawm sa mayu myit gaw n-gun atsam rawng ai kumla rai nga ai, gawng kya ai kumla n re ai.

Chyoi Pra ai Wenyi a shatsawm jahtap ya ai hpe hkap tau la ra ai, pat shingdang da ai lam n mai galaw ai. Ramma ni hpe mung shara tam la lu na matu shara shaman da ya ra ai. Tsun mayu ai gaw shanhte ni galai shai tsawm htap na lam hpaw ya ra ai, nga nna mung Wa Sarabyin tsun da ai.

Magam bungli galaw ai Hkristan hpung masha ni gaw Hkristan ni a matu Vatican II hpawng kaba hta matsun da ai, the Second Vatican Council's exhortation for Christians, hpe hti sumru dinglik hkan shatup sa wa ra ai. Grau nna aten kumla hte seng ai lam hpe hti sumru na matu Wa Sarabyin Francis, Hkristan bungli galaw ai ni hpe hpaji jaw shadum da ai.

Masum ngu na mungkan majan ngu tsun mai ai kap bra ana zingli a majaw hkrat sum, n-gun lagaw n rawng ai shawng lam hpe mada yu let n'nan re ai ladaw hta gaja ai galai shai lam ngu ai nli tum hpe hkai shaprut sa wa na matu mung Wa Sarabyin saw shaga da ai.

Myit hkrum kahkyin gumdin ai, shada garum pawnba la hkrat chye ai ni tai nga ra ai. Bungli n lu ai kadai n mai nga ai. Myu shayi ni hpe mung, ramma ni hpe mung bungli jaw ra ai. Shanhte lu ging ai hte maren mung shabrai jaw ra ai.

Shinggyim lam yan hte seng nna Nawku Hpung sharin shaga ai Social Doctrine of hte Church hpe n'nan galai shai ai a n'pawt daju shatai ra ai. Kahkyin kumdin ai, shada pawnba ai ngu ai gaw yawng hte seng ai, masha shagu hpe hkyawm la ai rai nga ai. Kadai hpe mung n mai shangam da ai. Masha shagu hta laklai shai ai atsam marai ni nga ma ai, nga nna Wa Sarabyin shang lang da ai.

Shada prinem htingram, mahkri shawn nna hpu nau nau na myit majing hte shawng lam myit mada shara de du hkra rau hkawm sa ga, ngu tsun let, San Yawsep gaw nanhte a magam bungli shagu hta kamsham tsawra myit hte galaw gunhpai sa wa lu na kasi tai nga u ga, nga nna Wa Sarabyin Francis, akyu hpyi ya da ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-12/pope-francis-movement-christian-workers-audience.html