Wa Sarabyin: Guadalupe Na Nu Maria Poi Misa Hkungga Nawng Jau

Wa Sarabyin Francis, December 12, bat 6 ya jahpawt, San Peter Nawku Htingnu Kaba hta Guadalupe na Nu Maria Poi Misa Hkungga nawng jau ai lam chye ju ai.

Dai Misa Hkungga hta Latin American mungdan ni hta na Jau tai jawngma ni, hte Sumtsan Dakkasa rung magam gun ni shang lawm ma ai.

Guadalupe Nu Maria hpe Americas dan, grau nna, Latin America a matu Hkawhkam Jan, San Pra Kanu ngu shamying ma ai.

Shi a Mungga hta Wa Sarabyin Francis ahkyak ai lam masum hpe madung da hkaw tsun da ai. Guadalupe Nu Maria a lam sumru ai a marang e “Law htam ai”, “shaman chyeju” hte “kumhpa”  lu la na re, ngu tsun shadum da ai.

Karai Kasang gaw shi hkum hpe anhte a matu galoi mung law htam ai hku jaw ya ai. Shi a hkum ting hpe anhte hpe jaw ya ai.

Karai Kasang gaw mai kaja ai lam hpe shaman ya ai. Ningpawt Ninghpang laika hta hpan da magam hpang ai kaw nan shaman ai lam lawm nga ai. Karai Kasang shi a hpan da magam yawng hpe kaja sa grai nan kaja sa ngu  hkam la ai. Shi hte hti htang byin ai lam gaw Sadan a lam rai nga ai, ngu Wa sharabyin Francis tsun shang lang da ai.

Law htam ai shaman chyeju gaw Karai Kasang kaw na lu la ai Kumhpa nan rai nga ai.

Dai Kumhpa gaw Chyoi Pra san seng dik htum ai Yesu Madu a Karai nsam hku na anhte hpe kum hpa jaw ai rai nga ai.

Guadalupe Nu Maria hpe myit sumru akyu hpyi htinglu htinglai ai let Karai Kasang a lai kasi ni hpe hkam la nna hpu nau ni a matu garan ya gachyan nga ga; shawang myit kaba hte garum shingtau lam ni hte law htawm ai shaman chyeju ni gaw masha yawng a matu rai u ga anhte a prat hpe kumhpa shatai let daw jau nga ga ngu Nawku Hpung masha ni hpe n gun jaw da ai.

Misa Hkungga nawng jau ngut ai hpang Guadalupe Nu Maria Sumla a shawng de sit sa let akyu hpyi let nawku daw jau lamang hpe shangut ai lam Vatican Shiga Dap Kaw nna ndau da ma ai.

Translated by Fr. Patrick Gawmaw Hkawng Yae

#vaticannews

#rvakachinservice

12 December 2020, 13:15

https://www.vaticannews.va/en/pope/news/2020-12/pope-celebrates-mass-for-feast-of-our-lady-of-guadalupe.html