Wa Sarabyin Gaw Mungkan Shara Shagu Hta Ana Zingli Hkrum Kaba Htum Myit Mat U Ga Matu Laklai Ai Akyu Hpyi Shara Lahkawng Kaw Matut Manoi Akyu Hpyi Nga Ai Shiga

Wa sarabyin gaw lai wa sai lusha gam ladaw 3 ngu na laban shani Vatican kaw na pru sa nna, Roma kata na ahkrak ai akyu hpyi shara lahkawn kaw mungkan ting a matu akyu hpyi ai hte, Covid-19 coranavirus tsin yam hkrum ai ni a lapran sa du ai.

Dai zawn akyu hpyi ai hta San Mary Major nawku htingnu kaba kaw nga ai Maria Salus Populi Romani hkrang sumla a shawng kaw akyu sa hpyi hpang ai. Maria Salus populi Romani gaw latin ga rai nna de a lachyum gaw, Roma myusha ni a hkam ja lam hte hkye hkrang la ai nu maria ngu ai rai nga ai. Ndai Nu maria hkrang sumla hpe lai wa sai AD 593 shaning hta Wa Sarabyin San Gregory the Great gaw (plague) kan hkyen ana zingli jahkring kau lu na matu yaw shada let hpai shang wa ai re lam chye lu ai. bai AD 1837 hta mung Wa Sarabyin Gregory XVI gaw dai Maria hkrang sumla shawng kaw sha mungkan ting hkrum sha nga ai kan hkyen ana zingli htum myit mat u ga matu hpyi nem lai wa sai lam chye lu ai.

Wa sarabyin matut manoi akyu sa hpyi ai shara gaw Roma masha ni hpe (Plague) kan hkyen ana zingli kawn makawp maga ai hpun wudang hta rai nga ai. Ndai udang gaw San Marcello nawku htingnu kaw nga ai rai nna, tsa ban 15 kawn akyu chyeju hpring ai hpun wudang re ai lam chye lu ai. Wan hpyen hte kan hkyen ana zingli hpyen kawn makawp maga ya ai lam chye lu ai. Wa sarabyin Yawhan paulu II gaw 2,000 shaning jubille chyeju hkamla lu na matu mara dat akyu hpyi ai shani hta dai wudang hpe ahpum pup manam nna akyu hpyi ai re lam chye lu ai. Moi Roma mungdan hta wan hpyen tsin yam hkrum ga ai rai nna, dai wan hkru ai hpang masum ning na ai jang Roma mungdan ting na masha ni (Plague) kan hkyen ana zingli kaba hkrum sha wa ma ai. Hkristan masha ni dai wudang hpe hpai shinggrup let akyu hpyi ai lam galaw jang dai kan hkyen ana zingli kaba hkoi yawm mat ai lam chye lu ai. akyu hpyi shinggrup ai lam hpe 1522 shaning, August shata 4 – 20 ya, nhtoi 16 ya tup galaw lai wa ai rai nna, dai zawn galaw ai a marang e kan hkyen ana zingli mai tsai wa ai lam chye lu ai.

Ndai zawn akyu hpyi ai lam a yaw shada ai gaw Covit-19 corona virus ana zingli hkrum sha nga ai ni a matu hte dai ana zingli htum myit mat u ga matu kanu Nu Maria a laklai ai makawp maga ai hte madu yesu a shamai shatsai ya ai hpe hkam la lu u ga matu rai nga ai. Ndai shiga na la ai ni yawng mung Wa Sarabyin a yaw shada ai hta jawm pawng let akyu hpyi maja nga u ga yaw shada let Vatican shiga dap kawn shana ai shiga hpe RVA Kachin Service kawn shalai ndau dat ga ai.

#churchnews

#rvakachinservice