Wa Sarabyin Francis Tsi Rung Kaw Nhtoi Kadun Naw Rawng Nga Ra

Wa Sarabyin Francis a ga tsi tsi lajang ai lam tsep kawp bai mai tsai wa lu na matu shi tsi tsi lajang nga ai Roma kaw na Agostino Gemelli tsi rung hta nhtoi lahkawng masum ya naw rawng nga ra na re lam chye lu ai.

Wa Sarbyin a Pudung kan gyip ana  ga tsi lajang ai lam (post-surgical operation) awng dang sai raitim, kaja dik ai hku matut tsi lajang lu na matu hte atsawm sha bran wa lu na matu tsi rung kaw n htoi kadun naw nga ra na re nga nna Vatican kaw na tsun na ahkaw ahkang nga ai Matteo Bruni tsun ai hte maren chye lu ai.

Lai wa sai laban shani na shani ka-ang akyu hpyi Angelus garai galaw shi yang Wa Sarabyin gaw tumour ngu ai shan shajan  ga lajang  ai gawk na machyi masha ni hte shanhte a dum nta masha ni rau hkrum zup ai lam galaw nna tsi rung a  htap  10 de lung wa n htawm dai kaw nga ai masha ni hte Angelus akyu hpyi ai lam galaw lai wa ai.

Dai hpang tsi rung na kaga machyi masha ni hpe hkrum shakram ai lam galaw nna Tsi Sara kaba ni hte Nuse tsi sarama ni rau jahkring hkrum shaga ai lam galaw lai wa ai. Shana maga Wa Sarabyin hpe gawn lajang garum nga ai ni the rau  dinghkrai Nawku Jawng Chapel kaw Laban Misa galaw lai wa ai lam chye luai.

Bai, Wa Sarabyin Francis gaw Agentina hte Italy gawdin ginsup hpung ni  champion awng padang lu ai majaw  kabu pyaw ai lam tsun lai wa ai.

Wa Sarbyin tsun ai hta, “ Ginsup shingjawng ai ngu hta kaning re ai mahtai hpe tim hkam la ra ai, sum tim galoi myit n shayawm ai sha matut dingyang shakut ra ai, dai the maren anhte a prat hta yak hkak ai lam hkrum katut ten  myit n shayawm ai sha myit mada ai lam tawn let kam sham ai myit hte shakut ra nga ga ai” nga nna tsun n gun jaw lai wa ai lam Vatican shiga dap kawn shapoi dat ma ai.

Source : Vatican News