Wa Sarabyin Francis, Slovakia Mungdan hta, September 12 Ya Shani Na Lamang

Thursday, September 16, 2021

Wa Sarabyin Francis, Sarabyin tai ai hpang, shi a apostolic visit, maigan mungdan de sasana hkawm kawan katsan ai (34) lang ngu na hkrunlam hpe September 12, laban ya shani hpang ai rai nga ai. Italy mungdan ahkying 6:09 a.m, aten hta Roma kaw nna Hungary mungdan, Budapest de Rome’s Fiumicino nbungli daru kaw nna rawt hpang ai rai nna 7:42 a.m aten hta Budapest nbungli daru pa de du shang ai lam Vatican Shiga Dap kaw nna ndau da ma ai.

Wa Sarabyin Francis, Budapest kaw shawng ningnan na shi a Apostolic visit hpang ai mung rai nga ai. Budapest kaw du ai shaloi, Hungary mungdan a Apostolic Nuncio, Saradaw kaba Archbishop Michael Blume hte Sarabyin Rung (the Holy See) hte matut mahkai ai Hungary sumtsan salang hkringmang daju, Ambassador, Eduard Habsburg-Lothringen yan hte rau mungdan masha ni kabu gara hkap tau la ma ai lam chye lu ai.

Wa Sarabyin Francis, Laban shani, Budapest kaw du ai hte rau Hungary mungdan na Kahtawlik Saradaw ni yawng hte mung hkrum saga nna dai hpang Laban Misa Hkungga nawng jau woi ai re lam chye lu ai. Misa Hkungga hta, Makam Masham a majaw zingri zingrat hkrum lai wa sai ni a labau gaw Hungary mungdan, mung shawa masha ni hta mung nga nga ai rai nna Hkristu shi a hkum hte sai hpe anhte a matu nawng jau ya ai hta shanhte ni mung lawm nga ma ai ngu sumru sang lang n-gun jaw da nga ai.

Wa Sarabyin Benedict XVI (Hkring sa) a sharin shaga ga, sak ningnan hka nu kaba gaw shi a npawt nhpang kaw nna nan lwi hkrat nga ding yang rai nga ai; Hkristu kaw nna anhte kaw lwi shang nga ding yang rai nga ai; dai gaw Karai Kasang hte shinggyim masha ni matut mahkai ai labau hta anhte hpe shang lawm akyu hkam sha shangun ai rai nga ai, ngu nna mung Wa Sarabyin Francis sang lang n-gun jaw da nga ai.

Matut nna mung sai rum shinggyim nau na myit majing rawng ai sakse ni tai nga na matu, myit mada lam hpe gaw de ai ni tai nga na matu, sagu hpung ni a sagu rem kaja ni tai nga na matu mung n-gun jaw saw shaga da nga ai.

(52) lang ngu na International Eucharistic Congress shangut Misa Hkungga mung rai nga ai Laban Misa Hkungga nawng jau ngut ai hpang Hungary mungdan a nation’s President, Janos Ader hte Prime Minister, Viktor Orban, bai Deputy Prime Minister, Zsolt Semjen ni hte hkrum shaga ai lam chye lu ai.

Shanhte hte hkrum shaga ai hta, Mungdan kata Nawku Hpung a magam lit ni hte seng nna mung, makau grupyin shingra tara hpe makawp maga ai lam hte seng nna mung, kun dinghku masha ni hpe makawp maga, shatsaw sharawt ai lam ni hte seng nna mung bawngban ai re lam chye lu ai.

Hungary mungdan a hkringmang daju, Janos Ader hpe Wa Sarabyin Francis hkum nan San Peter Nawku Htingnu hta shaman da ai “mosaic depict” kumhpa hpe mung kumhpa sak jaw ya ai re lam chye lu ai. “Mosaic depict” ngu ai gaw Lungpa, pat, plastic zawn re ai ni hta sumla hkrang shala da ai sumla lungpa kaji ni hpe tsun ai rai nga ai.

Shanhte hte hkrum shaga bawngban ai aten hta Secretary of State, Cardinal Pietro Parolin hte Secretary for Relations with States, Saradaw kaba Archbishop Paul Richard Gallagher yan mung Wa Sarabyin Francis hte rau manang tai let shang lawm ma ai lam chye lu ai.

Dai hpang Renaissance Hall of the Museum hta Hungary mungdan na Saradaw ni hte laksan hkrum shaga ai lam hpe mung galaw ai lam chye lu ai.

Saradaw ni hte hkrum shaga ngut ai hpang Hungary’s religious Sasana hpung ningbaw ni hte hkrum shaga lamang hpe bai matut galaw ai. Shanhte hte hkrum shaga ai hta, ginlum kahkying gumding lam a rupawt ni tai nga na matu, mungkan ga hpe pu sawm shangun ai ni tai nga na matu madung da n-gun jaw da ai.

Hungary hta du sa ai laban shani mung ang ai majaw gaw, Laban shani shagu, Wa

Sarabyin hkum nan woi awn ai, “Madu A Lamu Kasa Akyu Hpyi Ga” tsun ai akyu hpyi lamang hpe mung Budapest kaw sha galaw ai rai nga ai. Madu A Lamu Kasa Akyu Hpyi Ga tsun ten, wudang gaw nanhte a shawng na prat hte du na ra ai prat hpe matut mahkai ya ai wudang tai ya u ga ngu akyu hpyi let Wa Sarabyin Francis sharin shaga da nga ai.

Dai hpang Wa Sarabyin Francis Slovakia Mungdan de matut hkrum sa ai rai nga ai.

Sunday, Sept. 12

6:00 a.m. - Departure by airplane from Rome/Fiumicino International Airport for Budapest

7:45 a.m. - Arrival and official welcome at Budapest International Airport

8:45 a.m. - Meeting with the President of the Republic and the Prime Minister at the Museum of Fine Arts in Budapest

9:15 a.m. - Meeting with bishops

10:00 a.m. - Meeting with representatives of the Ecumenical Council of Churches

and some Jewish communities in Hungary

11:30 a.m. - Holy Mass and Angelus at Heroes' Square in Budapest

2:30 p.m. - Farewell ceremony at Budapest International Airport

2:40 p.m. - Departure by airplane for Bratislava

3:30 p.m. - Arrival and official welcome at Bratislava International Airport