Wa Sarabyin Francis: Kahtawlik Hpaji Ninghkring Ni Gaw Myit Sawn Shingran San San Sha Re Ai Lam Ni Hpe Ninghkap Ra Ai

image from Vatican website

November 12, bat kru ya shani, World Union of Catholic Teachers (WUCT), Mungkan Ting Na Kahtawlik Sharin Sara ni hte Wa Sarabyin Francis hkrum zup ai shaloi, Kahtawlik Sharin Shara ni hpe, "Hkristan Hpaji Lam gaw shinggyim Karai hpan da ai shinggyim ladat, Hkristu gaw de da ai Hkristan ladat hte hpring tsup ai hpaji ladat rai ra ai; myit sawn shingran san san sha re ai hpaji ladat hte n mai re ai, dai lam hpe ninghkap ra ai ngu shadum sadi jaw da ai.

"WUCT" Mungkan Ting Na Kahtawli Sharin Sara Hpawng hpe 1951 shaning hta gaw de hpang ai re lam chye lu ai.

Yaw shada lam gaw mungkan shara shagu na Kahtawlik Sara hpung ni shada matut mahkai mahkri shawn, sawk sagawn hkaja, "sharin matsun" hkrang shapraw nna Nawku Hpung a sharing shaga ai lam ni hpe hpaji jawng ni hta sharin achying ya lu na matu rai nga ai. Kanu kawa ni, sharin sara ni hte rau sharin hkam la ai jawngma ni hkum nan shang lawm ai hpaji ladat ni hpe madung da ai lam ni hpe gaw de sa wa na matu ahkyak da ra ai ladat hpe ahkyak madung da ai.

Ndai wuhpawng hpe gaw de hpang ai kaw nna myit lawm hkum lawm shawang myit hte garum madi shadaw shang lawm ap nawng lai wa sai ni hte prat masa hta hkan nna dai ni du hkra matut manoi ladat shaw hkrang shapraw ap nawng nga ai ni hpe Wa Sarabyin Francis chyeju dum ai lam tsun da nga ai.

Wenyi lam san san sha n re ai, kaga mungkan hte seng ai lam mung n re ai, shanhte a aten, bai, htunghking lailen ni hta ru jung ai lam ni hpe madung da ra ai. Shanhte hta kaja wa ra ahkyak ra kadawn ai lam ni hpe chye na hkra, kaja wa akyu rawng akyu pru ai ai ga san  ni a mahtai ni hpe chye na hkawn hkrang hkra, myit masin kraw lawang kaw nna nan hkrit tsang nga ai lam ni hpe mu mada nna tsi tsi la lu hkra, bai, jawng ma ni tawn da ai yupmang shingran kaja ni hpe chye na lu na hpe madung yaw shada ra ai.

"Hkristan ngu ai n nga yang shinggyim masa (humanism), shinggyim masa n nga yang mung Hkristan ngu ai n nga ai." nga nna Wa Sarabyin tsun sang lang da ai.

Kahtawlik sharin sara ni gaw Hkristan makam hpe shinggyim masha ni hta jaw bang ya lu matu gaw ramma ni a yupmang shingran ni hte shanhte a rawt jawt galu kaba bawngring wa ai lam ni hpe n mai zen di kau ya ai. 

"Anhte yawng a mahkrum madup hte maren hpaji sharin ladaw ni hta kaja ai ai hte hpaji rawng ai sharin sara ni gade ram ra ahkyak ai hpe dum shai chye na da ga ai", nga nna Wa Sarabyin tsun ai.

Ahpa atan myit jasat hte aten hpe shareng tawn da ai gaw hpaji hparat lam hpe jahten sharun kau ya ai. Sharin Sara ni gaw jawngma ni a prat hta hkan nna, aten hta hkan nna, shanhte hpe madung da ai ladat ni hpe galaw galai shai shatsawm ya ra ai.

Dai ni na prat hta, myit shingran san san sha re ai lam ni hpe dawk bang ya ai gaw shinggyim prat hpe jahten sharun ya nga ai; dai gaw dingbai dingna kaba re ai; ana zingli kaba rai nga ai.

Wa Sarabyin Francis gaw shi a mungga hpang jahtum hta, Mungkan ting hte seng nna akyu rawng, tara shang ai myit hkrum dawdan gawde da lam ni hpe machye machyang ningmu jahpaw, jai lang let dai ni na nampu, hpawt ni na nam si tai na, myit mada shara nga ai ramma ni, jawng ma ni hpe hapji sharin achying sa wa ai hta Mungkan Kahtawli Hpaji Sharin Hpawng Kaba (WUTC) kawn garum sa wa na matu n-gun jaw lit shatsam dat nga ai.

 

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-11/pope-warns-catholic-educators-against-ideological-colonization.html

 

Add new comment

5 + 1 =