Wa Sarabyin Francis Gaw: Ra Kadawn Ai Ni Hpe Jaw Ai Ni Gaw Karai Kasang A Chyeju Law Law Hkam Sha Ai Hpe Dum Chye Ai Ni Rai Ma Ai

Pope Francis

Wa Sarabyin Francis Gaw: Ra Kadawn Ai Ni Hpe Jaw Ai Ni Gaw Karai Kasang A Chyeju Law Law Hkam Sha Ai Hpe Dum Chye Ai Ni Rai Ma Ai

February 24, bat manga ya shani, Wa Sarabyin Francis, Pro Petri Sede Association (for the See of Peter) San Peter Tingyang hta dung ai Sarabyin hpe karum ya ai wuhpung malawm ni hte hkrum shaga ai shaloi, shanhte a shawang myit kaba hte San Peter a tingyang ahkang aya hpe hkam la lu ai wa hte the Holy See hpe karum ya nga ai majaw chyeju dum ga tsun let dai ni na mungkan hta majan tsin-yam hkrum ai, matsan tsin-yam hkrum ai, kau da hkrum ai, ndai ni zawn re ai ra kadawn ai ni hpe shawang tsawra myit hte karum jaw karum ya na matu hpyi shawn da nga ai.

Pro Petri Sede malawm dat kasa ni gaw lahkawng ning hta kalang Roma de buhkawm akyu hpyi ai lamang hte maren lai wa sai bat manga ya shani sa du ma ai.

Pro Petri Sede Association hpe tsaban 19 aten, gaw de hpaw hpang lai wa ai rai nna, ya ten Belgium, Netherlands, hte Luxembourg ni hta tatut magam galaw nga ai. Shinggyim bawngring lam hte karum shingtau ya ai magam ni hpe Sarabyin a sagu rem sasana, bai the Holy See a magam bungli ni hte matut mahkrai hkrishawn nna tatut bungli galaw ai wuhpung rai nga ai.

Lusha Gam Ladaw gaw tingkyen myit jasat kaw nna shanglawt ai shawang tsaw ra myit de galai shai wa na matu shadum nga ai lam, majan tsin-yam hkrum ai ni, numja numjan hkrum gumshen hkrum ai ni, kau da hkrum ai ni, wenyi lam hkum hkumhkrang lam hta matsan mayan re ai ni hpe karum shingtau ya na gaw dai ni na prat hta hkyak hkyak ra ahkyak nga ai lam, Wa Sarabyin Francis, tsun shana da nga ai.

"Ngai" ngu ai tingkyeng myit a mayam prat kaw nna lawt lu ra sai lam, Karai Kasang hpe mung hpu nau nau na ni hpe mung shanglawt ai myit hte tsaw ra daw jau lu ra ai lam, Wa Sarabyin Francis shadum da ai.

Wa Sarabyin Francis gaw shawng na Hkristan ni a shawang tsaw ra myit, shanhte a ginlum kahkyin gumdin ai hpe mung hkai dan let, anhte madu da lu ai lam ni yawng gaw Karai Kasang a kumhpa re lam tsun shadum nna, Karai Kasang jaw ya ai chyeju kumhpa gaw ra kadawn anhte a hpu nau nau na ni hpe karum ya na matu re lam tsun shadum da ai.

"Karai Kasang gaw anhte hpe chyeju kumhpa law law jaw ya ai majaw, anhte gaw hpu nau nau na ni hpe karum lu ai rai ga ai."

 

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2023-02/pope-god-gives-us-abundantly-so-that-we-may-give-to-others.html

 

Add new comment

10 + 5 =