Wa Sarabyin Francis : Christmas Hta Asak Hpe Jaw Ya Ai

“Bethlehem mare hta asak hpe Karai kasang la kau la ai nrai, jaw ya ai madaw she rai nga ai, Madu Yesu dum su ushat wa kang hta shangai wa ai lam gaw, anhte tinang a prat hpe ra kadawn nga ai hpu nau ni hpe garum lakawn la ai lam galaw let sak hkrung nga na matu shadum sharin ya nga ai,” nga nna Dec 24 ya shana Hkristmas yup tung Missa hkungga hta Wa Sarabyin Francis hkaw tsun lai wa ai.

Wa Sarabyin hkaw tsun ai hta, “Bethlehem ngu ai gaw ‘malu masha htingnu’ ngu ai lachyum rai nga ai, ‘nanhte a matu malu masha tai ya na matu ngai nang e rai nga nngai’ nga nna Madu Yesu tsun nga ai lachyum rai nga ai, shi a asak aprat hpe nan madu Yesu anhte hpe ap jaw ya ai, prat ngu ai gaw tinang a matu chyu tam mahkawng, yu nhtuk hkra araw sha lam ni galaw nna sak hkrung nga na matu nrai, daw jaw ai, gam garan ai lam ni galaw let sak hkrung nga ra ai ngu ai lam hpe madu yesu sharin shadum nga ai.

 Shinggyim masha ni a npawt shut hpyit mara gaw nmai sha ai ngu ai malu masha hpe la sha ai mara, namak law hpa ai, grai ju  grai mak ai masa byin tai mat wa ai mara rai nga ai. Dai ni na prat hta mung, asak matut na malu masha sha hpa pyi nlu re ai matsan mayan re ai masha ni law law nga nga ai a lapran, masha nkau mi gaw hkyik hkam dik ai malu masha ni chyu daw sha nna nga nga ma ai ni mung nga ma ai.

 Ushat wa kang a man hta anhte tsap mada yu nga ga ai aten, asak a malu masha ngu ai gaw sha hpa arung arai hpe ngu ai nrai, tsawra myit madaw she rai nga ai, lu sha mak ai lam nrai, tsawra matsan dum lama ai lam madawshe rai nga ai, mying dan hkung arawng lu lam nrai, shagrit shanem ai asan sha re ai lam she rai nga ai, ngu ai hpe anhte dum mu chye wa ga ai, shani shagu sha na malu masha anhte ra ga ai ngu ai lam hpe madu yesu chye nga ai.

Shi a prat hpe anhte a malu masha hku nna shani shagu madu yesu anhte hpe jaw ya nga ai, anhte a matu sha hpa tai wa u ga missa tawn ntsa hta shi a hkum hpe muk shatai nna anhte hpe ap jaw ya ai, anhte tinang a sha ku kaw nna lawan wan rawt tsap let sha na shah pa malu masha nlu byin nga ai masha ni hpe daw jaw lam galaw na matu, shah pa malu masha gam garaan jaw lam galaw na matu madu yesu anhte hpe saw shaga nga ai” ng anna Wa Sarabyin hkaw tsun lai wa ai lam Vatican shiga dap kaw nna shana dat nga ai.   

Source : Vatican News