Wa Sarabyin: Du Na Hkristmas Mahkawn Shing Jawng Poi Hta Shang Lawm Na Ni Hte Hkrum Shaga N-gun Jaw Da Ai

November 22, bat langai ya shani, Wa Sarabyin Francis, du na Hkristmas mahkawn shing jawng poi (Christmas Contest) hta shang lawm na ni hte hkrum shaga n-gun jaw ai hta “chyam bra ana tsin-yam hkrum nsin prat hta Hkristmas a nhtoi shingkawng htoi tu nga u ga” ngu akyu hpyi yaw shada lam tsun da nga ai.

Ndai Hkristmas Mahkawn ningnan hpe ka shalat nna mahkawn shing jawng lamang

hpe galaw na matu the Pontifical Foundation Gravissimum Educationis hte Missioni Don Bosco Valdocco kawn woi awn zinglum da ai re lam chye lu ai.

Wa Sarabyin mung dai shing jawng lamang hta shang lawm na sharawng awng ai Ramma ni yawng hpe alak mi rai nna saw shaga n gun jaw da nga ai.

Du Sa Ladaw Hte Covid Tsin-yam

Wa Sarabyin, Ramma ni hte hkrum shaga lu ai majaw kabu pyaw ai lam tsun let, nawku daw jau shaning a shaning ningnan “Du Sa Ladaw” du shang wa sana lam, dai hpang gaw Hkristmas ladaw rai sana lam, hte dai ladaw ni a mungsung lam ni hpe myit aru nga na matu mung saw shaga da nga ai.

Anhte a myit mada shara hpe n shamat kau hkra sadi maja nga ra ga ai. Madu Hkristu a shangai poi nhtoi hta rawng nga ai lachyum, “matsan dum lama ai hte si mani ai lam” ni gaw anhte a yak hkak jam jau ai lam ni hta n-gun ban ya na ra ai. Hkristmas a tsawm htap ai lam gaw shagrit shanem ai hte shinggyim masha ni hpe myit alum ala byin shangun ai rai nga ai.

Hkristmas Sama

Hkristmas a tsawm htap ai lam gaw teng man jaw ang ai tsaw ra myit hpe madun ai, garan kachyan ai lam galaw ai rai nga ai.

Hkristmas gaw tsan gang shangun ai lam n re ai, ntsa lam sha mung n re ai, lawt mat ai lam mung n rai nga ai. Masin salum hpe dam lada shangun ai hte akyu rawng ai hku, tinang a hkum hpe kumhpa shatai nna sak jaw ai lam rai nga ai. Htung hking lailen, shinggyim lailen, hte hpaji machye machyang ni hte seng ai lam ni hpe shatsawn jahtap ai lam rai nga ai, ngu Wa Sarabyin Francis, Hkristam a lam shang lang da ya nga ai.

Atsam dat gyin shalat ai lam

Tinang ra ai lama ma hpe hkam la lu na matu gaw atsam marai dat ra ai. Wuhpung wuhpawng a matu tinang hkum hpe ahkyak ai hku myit la nna ap nawng dau jau ra ai.

Atsam marai dat ai hte ningnan gyin shalat ai ladat gaw Hkristmas mahkawn mangoi hpe ka shalat na hte garan kachyan na hta grai nan ahkyak ai. Shinggyim rawt jat ai myit masin hte kaja grau ai mungkan hpe rau ta gindun let gaw de sa wa na yupmang shingran hta shada kam hpa kam shamyet myit kaba hte hkawm sa nga ra ai, ngu mung Wa Sarabyin Francis n-gun jaw da nga ai.

Myit htum gawng run lam ni hpe la kau ya lu ai tsawm htap ai lam

 “Anhte nga pra ai ndai mungkan tsawm htap nga na gaw ra ahkyak ai; shaloi she myit htum gawng run ai lam ni hta n hkrat sum mat na ga ai,” ngu San Pra ai (Wa Sarabyin) Pawlu VI a mungga hte mung Wa Sarabyin Francis, Ramma ni hpe n-gun jaw da nga ai.

Hpang jahtum mungga ginchyum dat ai hta, Ramma ni hpe Chyeju dum ga tsun let, yungwi hpaji ninghkring ni, ginsup ninghkring ni, bai, kaga lam ni hta ningtawng ai ni yawng gaw tinang kung kyang ai hte shada tsaw ra lam madun, shada daw jau, garan kachyan, Hkristmas hpe shatsawm ai nhtoi ni tai nga u ga ngu saw shaga da nga ai.

 

 

Fr. Patrick Gawmaw Hkawng Yae

 

https://www.vaticannews.va/en/pope/news/2021-11/pope-francis-discourse-participants-christmas-contest-2022.html

 

Add new comment

1 + 1 =