Wa Sarabyin: Chyoi Pra Buga Hte Myanmar Mungdan Simsa U Ga, Akyu Hpyi Ga

Wa Sarabyin a Tweet kaw, June 8, bat lahkawng ya shani hta kamsham ai hpung masha ni yawng tinang a makam hte maren simsa lam a matu minute mi zim sha nga nna akyu hpyi ga ngu saw shaga da lai wa ai.

Kamsham ai shinggyim num, la ni yawng simsa la a matu bat lahkawng ya shani, hkying langai aten hta minute mi zim sha nga nna, tinang a makam htung lai hte maren, Chyoi Pra Buga (Holy Land) hte Myanmar mungdan simsa wa u ga matu akyu hpyi ga ngu, bat lahkawng ya jahpawt, Wa Sarabyin Francis shi a tweet account kawn saw shaga da lai wa ai rai nga ai.

Ndai saw shaga ai lam hpe May 6, laban shani na “Madu a Lamu Kasa Akyu Hpyi” ten hta mung saw shaga da lai wa sai re lam mung chye lu ai.

Ndai saw shaga da ai hpe hkap la lu ai “Secretary General of the International Federation of Catholic Action, Maria Grazia Tebaldi mung “ya na zawn Wa Sarabyin saw shaga ai gaw masha hkum shagu shanhte a shani shagu sak prat hta simsa lam hpe gaw de ai ni tai nga mu ga matu hpyi shawn ai mung rai nga ai ngu tsun sang lang da ya ai.

Vatican shiga dap kawn Tebaldi hpe hkrum shaga lamang galaw ai shaloi, ndai yaw shada ai lam hpe 2014 shaning hta shawng ningnan hpang wa ai rai nna, June 8 ya shani shagu Chyoi Pra Buga (Holy Land) simsa na matu akyu hpyi nga ai rai nga ai,” ngu tsun sang lang da ya ai.

“Daining gaw masha hkum shagu a myit masin hta Myanmar mungdan a matu madung yaw shada akyu hpyi na matu laksan shalawm da ai rai nga ai” ngu mung matut tsun dan wa ai.

Akyu hpyi ai hta gara hku shang lawm mai na lam mung Tebaldi lam matsun da ya ai. Wa Sarabyin saw shaga da ai gaw mungkan masha yawng hpe rai nga ai. Shanhte a dum nta hta, bungli galaw shara hta sha n-ga, gara shara kaw mi du taw ai raitim shanhte nga ang ai shara, shing n rai, htuk manu ai shara hpe lata la nna akyu hpyi mai nga ai, ngu hpaji jaw da ai hpe Vatican Shiga Dap kaw nna ndau da ya ma ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-06/pope-one-minute-prayer-peace-holy-land-myanmar-tweet.html