Wa Sarabyin: Canada Mungdan, Buga Masha Ni A Matu Myit N Pyaw Ya Ai Lam Tsun

July 25, bat langai sha shani, Wa Sarabyin Francis, Edmonton na Maskwacis Pa hta buga masha ni hte hkrum shaga ai shaloi, shanhte a matu myit n pyaw lawm ai lam tsun da nga ai.

Hpaji Jawng ni hta ra rawng gawng kya ai lam ni law law nga nga ai majaw myit tsang myit pu lawm ai rai nga ai.

India masha ni nga ai hpaji jawng ni hta byin ai n tara ai lam ni nga ai majaw re lam chye lu ai.

Buga masha ni hpe hkum hkrang lam, myu ga hte laili laika, myit masa lam, wenyi lam yan ni hpe hkra machyi shangun ai hpaji sharin hkrang masa ni nga nga ai majaw, Wa Sarabyin Francis, myit n pyaw lawm ai re lam chye lu ai.

Buga masha ni a labau hta grai nan myit yawn hpa labau langai rai  nga ai.

Hkristan garam ningtum ni nga nga ai raitim, kam hpa nawku daw jau lam ni nga ai raitim, sak kaji ma ni hpe yu lakawn ai lam nga ai raitim, Madu Yesu a Kabu Gara Shiga hte nhtan shai ai hkrang masa, ladat re ai majaw buga masha ni hpe hkra machyi ai lam law nga ai rai nga ai.

Ndai n jaw n ang ai hkrang masa lam ni a matu hpyi nem tawng ban ai gaw shawng na lahkam rai nga ai. Dai hpang na lahkam ni gaw buga masha ni a htung lailen ni hpe gaw sharawt ya na lam ni rai nga ai, ngu Wa Sarabyin Francis matut shadum da ai.

Tsi tsi la na hte prinem hting ram lam lu na matu, Karai Kasang a chyeju ra kadawn ai lam, rau hkawm sa ra ai lam tsun let ndai lahkam ni hta Karai Kasang lam woi ya u ga ngu Wa Sarabyin Francis akyu hpyi da ya nga ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-07/canada-pope-reiterates-shame-for-indian-residential-schools.html