Wa Sarabyin: Canada Mungdan, “penetential pilgrimage”, Hkrun Lam Hta Makaw Maga Ya Ai Nu Maria Hpe  Chyeju Dum Akyu Hpyi Ai

image for Vatican Website

Wa Sarabyin Francis a Canada mungdan hpung kawan masin, July 24-29 laman, angwi apyaw hkawm sa lu ai hpang Vatican de July 30, bat kru ya jahpawt daw, Vatican Shiga Dap kaw nna ndau da ma ai.

Shawoi galaw nga ai hte maren, Wa Sarabyin Francis, hpung kawan hkawm nna Vatican de bai du wa ai hte rau, San Mary Major Basilica Nawku Htingnu kata na Maria sumla shawng kaw, hput di akyu hpyi la ai lam chye lu ai.

Wa Sarabyin gaw “ancient Marian icon Salus Populi Romani” “Roma kaw nga ai masha ni a kam hpa shara Maria sumla” a shawng na tawn kaw manpan makai majaw langai mara da let chyeju dum chyeju shakawn kumla hku nna galaw lai wa ai lam mung chye lu ai.

Dingdung America dan hta nga ai, Canada mungdan de kru ya tup “penitential pilgrimage” hkrum lam hta makawp maga ya sai Nu Maria hpe chyeju dum akyu hpyi ai lam aten kadun galaw la nna, shi shanu shingbyi ai de wa nna hkring sa la ai lam chye lu ai.

Shi a hkrun lam, July 24-29 laman na mahkrum madup lam ni hpe sumru la ai hta myit n pyaw ai labau mabyin a majaw myit n pyaw hkam sha nga ai lam mung chye lu ai.

Shi sa du a mayan hkan na Hkristan ni gaw mungdan kaga kaw na bu htawt sa nga ai buga masha ni (indigenous peoples) ni a ntsa shut shai ai hku kanawn mazup ai, ginhkra da ai lam ni nga lai wa ai a matu buga masha ni hpe, Hkristan ni a malai tawng ban lai wa ai re lam mung chye lu ai.

“Ngai ndai kaw sa du ai gaw ‘penitential pilgrimage among you’ nanhte a lapran shada marawng raw, mara dat hkyamsa hkat, prinem htingram lam lu la mu ga, lapran kaw nna hpyi nem tawng ban kasa tai na matu sa du ai rai nngai; kaja wa sha, myit masin kaw nna nan myit n pyaw rai nga nngai; Hkristan nkau ni gaw Colony myit jasat hte buga masha ni hpe dip sha nga ai ni hpe madi shadaw ya nga ai hpe mu lu ai majaw myit n pyaw nngai; Buga masha ni a htung hking lam ni hpe makawp maga ai hta, shanhte a hpaji jawng hte seng ai masing lamang ni hpe madi shadaw makawp maga ai hta Hkristan Sasana wuhpung ni hte Nawku Hpung masha ni n shang lawm ai lam ni nga lai wa ai hpe mara dat hkyam sa ya na matu hpyi nem tawng ban nngai,” nga nna Wa Sarabyin akroi anoi hpyi nem tawng ban da nga ai.

Du wa na aten ni hta prinem htingram lam la let buga masha ni a shimlam, htunghking lam, hpaji lam ni hta rawt jat wa na matu rau jawm shakut ai lam ningnan hta hkawm sa na matu shadum n-gun jaw da lai wa ai rai nga ai.

 

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-07/pope-francis-apostolic-journey-return-rome-mary-major.html

 

Add new comment

16 + 2 =