Wa Sarabyin: Buga Masha Ni, Sasana Galaw Ai Ni, Anhte Ni

Wa Sarabyin Francis, San Pawlu VI a “Evangelii nuntiandi” hte, shi hkum nan ka da ai “Evangelii Gaudium” sharin shaga laika ni hpe lakap nna, Canada mung masha ni hpe sharin shaga ai lam hpe, July 29, bat manga ya sha, Vatican Shiga Dap kaw nna ndau da ma ai.
Wa Sarabyin Francis, Canada de sa du kawan ai gaw, “penitential prilgrimage” ga baw hte rai nga ai. Canada de sa du ai Wa Sarabyin a salum gaw dai ga baw hte hpring rai nga ai.
Buga masha ni hte nihtep ai hku na ai lam, mara dat hkyamsa ya hkat na lam, jiwoi jiwa ni kaw na yu hkrat jai lang wa ai hting hking lailen ni hpe manu shadan sawk sagawn, shatsawm jahtuk, makawp maga, sung lang na lam, buga kaw nga ai hpaji jawng ni hta hpaji sharin hkam la ai ni hpe manu shadan makawp maga shatsaw sharawt ya na lam ni gaw Mungdan daru magam ahkawng ahkang lu ai ni hte Hkristan Nawku Hpung ni a lit magam, shanhte a masin salum rai nga ra ai hpe Wa Sarabyin shadum jahprang da ya ai.
Hpu nau ni hpe jeyang daw dan na matu n re ai, tinang sumru masin jahkrat da ai hta sha hkan sa ra ai ngu ai myit masa mung n mai re ai. Madu Yesu a wudang lam hta nau na myit majing hte rau hkawm sa lu na matu shada sharin la hkrat ra ai, shada kasi tai ra ai lam Wa Sarabyin tsun da ai.
Dai gaw Nawku hpung a myiman pa lam rai nga ai; Kabu Gara Shiga hpe matut manoi shachyam shabra ai lam rai nga ai. Madu Yesu hpe sakse hkam let Karai Kasang a nta de hkap htau hkap pang la ai ni tai nga ra ai. Shaloi Madu Yesu gaw, shi a dum nta hta shang ai ni hpe shang lawt ai myit hte daw jau ya na ra ai, ngu matut hkaw tsun da ai.
Kaja grau ai lam ningnan, ladat ningnan ni hpe tam galaw sa wa chye ra ga ai: madat ya ai lam, matut mahkai tsun shaga hkrat chye ra ai. Karai Kasang a matu gawk san da, aten san da chye ra ga ai. Anhte a myit ra ai hku n re, Shi a myit ra ai hta, Kasa ni zawn, sharawng awng ai myit kaba hte gritnem ai yu maya prat hkrun lam hta hkawm sa chye ra ai.
July 29, bat kru ya shani, Canada Mungdan, Quebec na Jesuit Sasana Jau ni hte mung laksan hkrum shaga lai wa ai lam chye lu ai.
Hkrum shaga lamang hpe Quebec mare kaba na Saradaw Kaba shangu nga ai Ginwang Ginjaw dum nta kaw galaw ai re lam chye lu ai.

By Fr. Patrick Gawmaw Hkawng Yae
#vaticannews
#rvakachinservice
https://www.vaticannews.va/en/pope/news/2022-07/editorial-tornielli-pope...
https://www.vaticannews.va/en/pope/news/2022-07/pope-meets-with-canadian...