Wa Sarabyin: Buga Masha Ni Hte Kawoidwi Ni Gaw Nawku Hpung a Sari Manu Rawng Ai Ni Rai Ma Ai

July 26, bat masum ya shani, Edmonton na Commonwealth Studium (gawknu) hta Missa Hkungga nawng Jau ngut ai hpang, Wa Sarabyin Francis, Lac Ste. Anne, kaw mungga shaga hkaw tsun ai lam galaw ai.

Lac Ste. Anne shara gaw Dingdung America masha ni buga masha hku nga ai shara re lam chye lu ai. Dai shara gaw shamai shatsai ya shara ngu nna mung mying kaba ai shara rai nga ai.

Wa Sarabyin a mungga hta, buga masha ni hte kawoidwi ni gaw, Nawku Hpung a manu dan sut ni rai ma ai, ngu shakawn da ai lam, July 27, bat masum ya shani, Vatican kaw nna ndau da ma ai.

Lac Ste. Anne kaw sa du nga ma ai, hkying kaba hku re ai buhkawm akyu hpyi masha ni, bat lahkawng ya shani, buhkawm akyu hpyi masha ni hte rau akyu hpyi shang lawm na matu sa du ai Wa Sarabyin Francis hpe kabu gara hkap tau la ma ai.

Karai Kasang a hka la-ing ngu lachyum nga ai, Nakota Sioux ni a “ Wakamne” (Lake of God), Wenyi hka la-ing ngu lachyum nga ai, Cree masha ni a “lake of the Spirit”, ndai hka la-ing ni gaw tsi hka, wenyi jasan jaseng hka ngu mying kaba ai re lam chye lu ai. Canada hte Northwestern United States na masha ni hta mying grai kaba ai re lam chye lu ai.

Ndai shara hpe, tsaban 19 htum wa maga, Quebecois Kahtawlik Sasana shang ai masha langai, Madu Yesu a kawoi, Nu Maria a kanu San Anne poi nhtoi shani, July 26 ya shani hta “Lac St. Anne” ngu shamying hpang wa ai re lam chye lu ai.

“Karai Kasang a hka la-ing” (Lake of God) kaw du nga ai buhkawm akyu hpyi ai ni gaw, kanu mungkan a salum zawn hkam sha lu ai rai nna, dai hka a marang e hkam ja lam lu na hpe mung myit mada lu ma ai.

“Ndai shara kaw du ai ten hta, Madu Yesu sasana galaw lai wa ai Galilee hka hkingau, chyoi pra ai shara de sa du mayu myit ni mung byin pru wa ai” ngu Wa Sarabyin hkam sham la hpe tsun dan da ai.

Ndai shara gaw, n bung pre ai masha ni yawng, langai hte langai, hpu nau myit majing myit rawng  wa shangun ai. Hka gaw asak hpe jaw ya ai.

“Asak kung dinggai dingla nga ai kun dinghku nta masha ni hpe tsun mayu ai: nanhte gaw sutgan kaja hpe lu da ai re! Ndai asak sutgan hpe nanhte a nta ni hta makawp da mu; yu gawn mu; manu shadan tsaw ra mu; Sali wunli kaba rai ng ai,” ngu Wa Sarabyin, kun dinghku masha ni hpe shadum da nga ai.

Asak kaba kanu ni hte kadwi ni gaw gaw kashu kasha ni a ana ni hpe shamai ya ai hta shaman manggala ga ni hte tsi tsi shamai ya nga ra ai.

Nawku Hpung ting gaw shamai shatsai ai hkam la nga ra ai. Nawku hpung gaw pru sa ra ai, jaw ra ai, tsaw ra ra ai. Kam sham ai masha ni yawng gaw yak hkak jam jau ai ni hpang de sa nna, shanhte a ra kadawn ai lam ni hpe, tsaw ra myit kaba garum jaw garum ya ra ai.

Karai Kasang gaw, Madu Yesu a kaji kawoi, Maria a kanu yan kawa, San Joachim hte Anne yan hku nna mung, nanhte a kaji kawoi ni hku nna mung, nanhte a hkru lam mahkra hta shaman chyeju jaw ya nga u ga, ngu akyu hpyi let Wa Sarabyin Francis, mungga hpe shangut da ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-07/pope-indigenous-peoples-grandmothers-are-treasure-of-the-church.html