Wa Sarabyin: Buddha Hte Hkristan Ni, Matsan Dum Lama Ai, Hkalum Dawjau Magam Hta Rau Ta Gindun Let N-gun Dat Ga

June 17, bat manga ya shani, Wa Sarabyin Francis, Buddha hte Hkristan ni rau ta gindun let matsan dum lama ai hte hkalum daw jau ai magam hpe grau grau galaw shakut sa wa ga, ngu n-gun jaw saw shaga da nga ai.

Thai Mungdan na Buddha dakkasa ni hte Vatican, San Paul VL Hkaw hta hkrum shaga ai shaloi, Buddha htung lailen, wenyi lam, nga sat nga sa lam ni hte seng nna na lu ai majaw mung Wa Sarabyin myit dik kabu ai lam mung chye lu ai.

“Mungkan shinggyim kun dinghku hte nga yawng nga pra gaw jahkrit shama ai lam law law hte hkrum sha nga ai ten hta makam hpung yawng shada hkrum shaga bawngban, rau jawm shakut sa wa ra ai,” ngu Wa Sarabyin n-gun jaw da ai.

Dai shani, Thai Mungdan na Buddha Hpunggyi (33) hte rau Theravada hte Mahayana Buddha jawng kaw na dakkasa marai (60), Thai Mungdan na Kahtawlik dakkasa ni hte Wa Sarabyin hkrum shaga ai re lam chye lu ai.

1972, June 5 ya shani hta Sanpra ai, Wa Sarabyin Paul VI hte dai ten na Thai Mungdan Buddha makam hpa-awn, the Most Vernerable Somdej Phra Wannarat hte hkrum shaga lai wa yu sai rai nna, daining gaw 50 ning hpring ladu hkrum sai rai nga ai.

Dai ten hta Buddha makam hpung hte Kahtawlik makam hpung lahkawng lapran shada tsaw ra hku hkau kanawn mazum let magam bungli ni rau galaw lai wa sai rai nna, ya ten du hkra mung matut manoi galaw nga ai rai nga ai lam Vatican kaw nna ndau da ma ai.

“Nanhte a htung lailen ni kaw nna nanhte hta ra kadawn ai manu dan ai wenyi lam, shinggyim nga sat nga sa lam hte shinggyim lailen lam ni hpe hkungga manu shadan ga ai,” ngu Wa Sarabyin Paul VI hkrum shaga ai shaloi tsun da ai hpe mung Wa Sarabyin Francis myit dum nga ai lam mung tsun da nga ai.

Wa Sarabyin Francis hkum nan mung, “Nanhte a dai manu dan ai lam ni hpe manu shadan ga ai. Dai hpe makawp maga, shachyam shabra, sharin shaga ya nga ai hta grau grau galaw shakut ra ai, ngu nna mung anhte garan kachyan ya nga ga ai. Anhte a lapran hta makam htung lailen ni hpe shada garan kachyan hkat let hpu nau myit majing hpe grau grau gawde sa wa na hpe myit mada ga ai,” ngu n-gun jaw, n-gun la ga tsun da ai.

2019 shaning hta Thai Mungdan de sa kawan ai shaloi mung, Shi hpe hpu nau myit majing hte hkalum daw jau lai wa ai a matu mung Thai Mungdan na Buddha hte Kahtawlik makam hpung masha yawng hpe bai myit dum ai hte chyeju mung dum ai lam matut tsun da nga ai.

Buddha hte Yesu gaw hpu nau majing myit ra ahkyak ai lam hpe chye da ma ai, ngu mung madi madun sang lang da ai.

Shada hkrum shaga, rau pawng galaw ai ladat masa lam gaw hkyak hkyak ra ahkyak ai rai nna, dai gaw jahkrit shama hkrum ai mungkan shinggyim kun dinghku a matu ya ndai shara, ndai aten hta nan manu dan la nga sai re, ngu mung Wa Sarabyin tsun da nga ai.

Buddha hte Yesu gaw n ru n ra byin ai lam, gumshen ai lam ni hpe npawt tingkyen myit jasat hpe awng dang kau lu na lam hpe chye ma ai.

Buddha gaw n hkru ai n kaja ai hpe koi yen mu, mai kaja ai lam hpe galaw mu, myit hpe san seng hkra tawn da mu, ngu sharin shaga ai lam (Dph 138), Yesu gaw Ngai nanhte hpe tsaw ra made ai zawn shada tsaw ra nga mu, ngu nna Tara Ningnan jaw da ai lam (Yh 13:34), Wa Sarabyin madi madun da ai.

“Hpan jahtum hku nna ngai nanhte hpe n-gun jaw mayu ai gaw Hkristan ni hte shada matut mahkai hkrum shaga nna sung grau, dam lada grau ai hku n-gun dat nga mu” ngu ginchyum dat mungga shaga let shakram dat nga ai.

By Fr. Patrick Gawmaw Hkawng Yae