Wa Sarabyin: Brazil Mungdan Kata Galung Gahkying Gumding Lam A Ningshawng Lahkam Hpe Shakawn Shagrau Ya

Wa Sarabyin Francis gaw Brazil Mungdan hta galung gahkying gumding lam a matu “Sem Terra Movement” ngu ai Covid-19 tsin-yam hkrum, kaw si hpang gara hkrum, yak hkak hkrum nga ai ni hpe garum ai ladat hpe galaw nga ai majaw shakawn shagrau laika hpe July 25, “Rural Workers in Brazil” nhtoi hta, Cardinal Michael Czerny hpe shagun dat ai lam chye lu ai.

“Wa Sarabyin a malai hku nna mung ngai hkum nan hku nna mung, ya na zawn yi sun hkauna galaw shatsawm nga ai ni, malu masha garan gachyan ai lam galaw ya nga ai hpe kabu lawm ga ai, chyeju mung dum ga ai” ngu Wa Sarabyin Francis a shagun laika hpe Cardinal Michael Czerny SJ, kawn mung shawa dawtsa kaw hti dan ya ai.

“Mare kaba a jup jahtum na yak hkak ai mare kasha na matsan mayan ni hpe garum pahtau galaw ai lam gaw Karai Kasang a Ja Mungdan gaw gap ai kumla hpe shadan shadawng ai rai nna, mung masha yawng galung gahkying myit hkrum lam hta kahpu kanau myit masin rawng ai kum la mung rai nga ai,” nga nna Cardinal matut tsun hpaw dan wa ai.

Brazil mungdan hta, Ya du hkra rai yang, malu masha garum ya ai lam Tons 2,500 hpe garum ningtum galaw ngut sai rai nga. 

Cardinal gaw, Mk 6:34-44 hta na, Madu Yesu a mungga hpe madat hkam la na matu hkan nang ai mung masha ni, kaw si hpang gara ai hpe Madu Yesu mu chye nna, muk tawng 5 hte nga 2 hpe garan sha ma yang hkru hkru kat sha ngut jang, sha ngam Mung ka 12 nga ai mabyin hpe mung bai hkai dan wa ai.

“Asak jahkrung ga! Chyurum kahpu kanau zawn tsawra myit makyit sumri shangang shakang ga! Wuhpung wuhpawng hpe gaw de ga!” ngu mung matut n-gun jaw da nga ai.

Ya na zawn matsan dum lama ai myit masin hte matsan jam jau ai ni hpe garum pahtau ai gaw wuhpung wuhpawng kata kaja ai katsi rai nna, wuhpung wuhpawng kaga ni mung katsi la hkan galaw sa wa na ma ai.

“Lahpawt ai myit hte mung nrai, jaw ra ai lit a majaw sha mung nre ai sha, langai hte langai gaw tinang a kraw lawang e myit da ai hte maren jaw u ga: hpa majaw nga yang, Karai Kasang gaw kabu gara ai myit hte jaw ya ai wa hpe tsaw ra nga ai.” (2Cor 9:7)

Shakawn shagrau laika hpang jahtum hta, “Chyoi Pra ai Wenyi gaw Covid-19 tsin-yam hkrum nga ai ni hpe n-gun ban ya nna, myit mada shara jaw ya u ga” akyu hpyi ya let, yi sun hkau hting hkauna galaw sha nga ai ni hte lamu ga hpe makawp maga ai ni hpe Karai Kasang tut nawng bau sin ya u ga matu mung akyu hpyi ginchyum dat da ai.

“Sem terra Movement” hpe English hku “The Landless Workers’ Movement” (MST) “Yi sun hkauna n’lu (kata) ai n-chyang chyang sha ai ni, yi sun hkauna, lamu ga lu mu ga, yaw shada let 1980 shaning hta hpaw hpang wa ai shamu shamawt ai lam langai rai nga ai. Ndai shamu shamawt hpung hte mahkri shawn magam galaw ai hta myit rum hpung 100, Jak rung magam hpung 96, hte  mung shawa wuhpung 1,900 rai nga sai lam chye lu ai.

Daini du hkra rai yang Brazil mungdan kata, mungdaw 26 hta na 24 kaw ndai shamu shamawt ai lam galaw nga sai rai nna, htinggaw 370,000 ngang gring ai sun wang madu lu sai; htinggaw 100,000 gaw shara kaja de htawt sit la lu wa sai.

28 July 2020, 16:31

Source : Vatican News