Wa Sarabyin Benedict XVI, Machyi Kaba Hkrum Nga Ai Shi Kahpu George Hpe Sa Du Kawan Ai Kaw Na Vatican De Bai N Htang

Vatican City

Hkring sa mat sai Wa Sarabyin Benedict XVI gaw, Machyi kaba hkrum nga ai Shi kahpu George hpe sa du kawan ai kaw na, June 21, bat langai ya shani Vatican de bai nhtang wa ai.

Shi hte rau Saradaw kaba Ganswein hte shi a hkam ja lam hpe htep lahti yu gawn nga ai ni mung shi hte rau hkan nang ma ai.

Asak (96) ning hpring sai Wa Sarabyin a kahpu George gaw hkam ja lam hta tsang ra masa nga ai lam Wa Sarabyin Benedict XVI hkum nan shawa masha ni hte hkrum shaga ai shaloi tau nau tsun dan da nga ai.

Kahpu a hkam ja lam hta hkan nna shi hte rau nga nga na re lam Vatican shiga dap, Director Mateo Bruni kawn tsun da lai wa ai. Wa Sarabyin a Kahpu gaw shi hte (3) ning gang nna shangai ai Ratzinger kahpu kanau lahkawng gaw galoi mung ni htep ai hku tsaw ra hku hkau ma ai rai nna, Freising Cathedral kaw 1951, June 29 hta Jau aya arau hkam la ma ai.

 Shan nau a kung kyang ai lam nbung ma ai. Kahpu Georg Ratzinger gaw shingni hpaji (Music) hta ningtawng ai wa rai nna, Sarabyin Benedict XVI mying ai Joseph Ratzinger gaw Karai hpaji hta ningtawng ai wa re lam chye lu ai.

 Ra sharawng ningtawn ai lam n bung ai raitim, shan nau shada galoi mung tsaw ra hku hkau lam nga ma ai. “Nye prat hpang wa ai kaw na nan nye hpu gaw manang langai hku sha n ga ai; shi gaw ngai kam hpa ging ai lam madun woi awn wa ai kahpu mung re,” ngu hkring sa mat sai Wa Sarabyin Benedict XVI hkum nan a hkam sha lam hpe mung tsun shapraw da ai.

Kahpu hpe sa gawan ai kaw na bai wa ai shaloi Munich kaw na kanu kawa yan hte kahpu ba hpe lup makoi da ai Ziegetsdorf lup wa kaw sa du kawan  nna, lup hpe ja san jaseng lam galaw let jahkring mi hkring sa akyu hpyi la wu ai.

1977 hta, Shi hpe Munich hte Freising Archdiocese na Saradaw kaba lit grai n shatsam shi yang, Dogmatics Professor magam gun ten nga lai wa ai, Regensburg na jahtum ma maga nga ai, Pendling kaw na nta dingsa kaw mung sa du kawan da lu ai.

Wa Sarabyin Benedict XVI gaw, hkum nan Sarabyin lit magam gun hpai nga ai ten Sarabyin rung kaw Secretary General of the Synod of Bishops, magam gun lai wa yu ai Germany na Saradaw kaba Archbishop Nikola Eterovic hte mung hkrum shaga la lu wa ai.

Wa Sarabyin Benedict XVI gaw Germany kaw papal visit hku nna, 2006 shaning hta hpang jahtum sa du da ai rai nga ai. Wa Sarabyin Benedict XVI hte machyi kaba hkrum nga ai shi kahpu Jau Georg Ratzinger a matu akyu hpyi garum ya ga ngu Vatican shiga dap kawn ndau da ai hpe RVA Jinghpaw nsen shapoi dap kawn shalai ndau dat ga ai.

22 June 2020, 14:00

Source: Vatican News