Wa Sarabyin Benedict XVI (Hkring Sa): Sarabyin Lahkawng Galoi N Mai Nga Ai

Wa Sarabyin Benedict XVI (Hkring Sa) gaw shi hkum nan daw dan nna Sarabyin magam kaw nnahkring sa lai wa ai lam, ndai zawn hkring sa na matu shi a matu yak hkak ai lam ni nga lai wa ai raitim dai hpe atsawm sha daw dan la lu ai lam Italy Shiga Dap Corriere della Sera hte hkrum shaga ai (interview) lamang hta tsun dan wa ai.

Wa Sarabyin Benedict XVI gaw lai wa sai masat (8) ning, 2013, February 28 ya shani hta tara shang hkring sa mat waai rai nga ai. Dai zawn hkring sa mat ai majaw myit n dik ai lam galoi n nga yu ai ngu hkrum shaga lamang (interview) hta matut tsun dan wa ai.

San Peter a tingyang hta magam gun na matu asak kaba lai sai majaw ya na zawn hkring sa mat ai lam re ngu mung tsun dan wa ai. Ndai gaw Italy Shiga Dap kaw Corriere della Sera hte hkrum shaga ai (interview) hta tsun dan wa ai ga ni rai nga ai.

“ Ndai gaw daw dan yak dik ai lam langai rai nga ai. Raitim, ngai ndai lam hpe mvit um ang ai lam n nga ai sha atsawm sha daw dan nna galaw lai wa ai. Nyea tsawro manang nkau ni gaw ngai daw dan ai lam hpe hkap la yak lai wa ma ai. Dai lam hte seng nna ngai hpe sin pawt kahtep ai lam naw nga ma ai.

Nkau ni gaw Vatileaks scandal ngu ai Vatican na mying n tsawm ai mahkang a majaw hkring sa mat ai ngu a ngai mu ma ai. Shanhte gaw ngai a daw dan ai lam hpe ngai na myit hte daw dan ai re ngu ai hpe n kam hkap la ma ai. Raitim, ndai zawn hkring sa na matu daw dan ai gaw kaja wa nan sha ngai na myit hte ngai daw dan ai re hpe asan sha sakse hkam mayu ai,"

ngu Wa Sarabyin Benedict XVI (Hkring Sa), shi hkum nan Corriere delln Sera hte hkrum shaga ai (interview) lamang hta tsun dan wa ai.

Du na ra ai March shata hta Wa Sarabyin Francis Iraq mungdan de Apostolic Journey hkrun lam hkawm gawan katsan na lam hte seng nna mung Wa Sarabyin Benedict XVI hte hkrum shaga ai lam galaw da ai hta, "Ndai hkrun lam gaw grai nan ahkyak ai hkrum lam re ngu ngai kam ai.

Myit n pyaw lam langai gaw Iraq mungdan kata mung masa simsa lam n nga ai hte Covid 19 tsin-yam hkrum ten re majaw gaw shim lam a matu tsang shara kaba nga na re. Dai majaw Wa Sarabyin Francis a hkrun lam hta akyu hpyi ai hku nna ngai mung arau rai nga na nngai," ngu hkrum shaga lamang hta tsun da ai hpe Vatican Shiga Dap kaw nna ndau da ma ai.

Source : Vatican News