Wa Sarabyin: Anhte Gaw Simsa Lam Hpe Hpang Gara Let Sak Hkrung Nga Ra Ga Ai

image from Vatican website

November 20, Hkristu Hkawhkam Poi laban shani, Madu A Lamu Kasa Akyu Hpyi Ga tsun ten, Wa Sarabyin Francis, majan n nga u ga matu akyu hpyi let simsa lam hte hpang gara let sak hkrung nga ra ai lam Hpung Shawa Masha ni hpe shadum jahprang da nga ai.

Missa Hkungga hpe gaw Italy, Asti mare kaba hta nawng jau ai re lam chye lu ai.

Simsa lam akyu hpyi

Anhte gaw simsa lam hpe hpang gara ai prat hta rai nga ga ai nga nna Wa Sarabyin Francis tsun ai. Ukarine majan hpe madung da sumru let majan tsin-yam hkrum mungkan shara shagu ma masa hpe sumru dinglik yu na matu mung Wa Sarabyin masha yawng hpe n-gun jaw shadum da ai.

Palestine, Gaza na htawt sit nga taw ai refugee camp hta wan hkru ai lam byin ai majaw n law htum masha 21 si mat sai hpe mung, Wa Sarabyin, tsun dan let shanhte a matu akyu hpyi ya nga na matu saw shaga da ai. Si mat ai ni hta ma kaji marai shi (10) lawm ma ai lam chye lu ai.

Shanhte a matu akyu hpyi ya ga; simsa lam nga wa u ga matu mung akyu hpyi nga ga, nga nna mung Wa Sarabyin matut saw shaga da ai.

Sak Ram Ramma Ni Gaw Mungkan Hpe Galai Shai Lu Ai

World Youth Day a matu Wa Sarabyin mungga htawn da ai hta sak ram ramma ni gaw mungkan hpe galai shai lu ai ni rai ma ai lam mung tsun shana da ya ai.

"Maria gaw alawan rat sa wa ai" (Lk 1:39). Ndai chyum daw gaw du na shaning Lisbon mare kaba hta galaw na Mungkan Ramma Nhtoi, World Youth Day a matu Wa Sarabyin lata da ai ga manoi rai nga ai.

Tinang tinghkyen a matu n sumru nga ai nga ga; lachyum kata aten n shama shalai kau ga; tsaw grau ai bandung a matu sak hkrung ga; man man shamu shamawt hkawm sa nga ga; hkrit tsang ai lam ni hpe kau da ga; Ra kadawn ai ni a matu ta ladawn ya nga ga, ngu tsun let, Wa Sarabyin Francis, simsa lam yupmang shingran ni hpe hkrang shapraw sa wa ga, nga nna Ramma ni hpe mung n-gun jaw da nga ai.

#vaticannews

#rvakachin Service

https://www.vaticannews.va/en/pope/news/2022-11/pope-francis-angelus-solemnity-christ-the-king-asti-november.html

 

Add new comment

2 + 8 =