Wa Sarabyin: Akyu N Hpyi Ai Jau Ni Gaw Yu Maya Prat Hta Sha Naw Nga Ai

November 11, bat manga ya shani, Wa Sarabyin Francis, Jau tai jawng ni hta sharin sara tai nga ai, shapan shalat nga ai, formator ni gaw Jau tai jawng ma (brother) ni man man akyu hpyi chye na matu sharin ya ra ai lam tsun shadum let man man akyu n hpyi ai a dingbai dingna lam ni hpe tsun dan sadi jaw shadum jahprang ya ra ai, ngu hpaji jaw da ai.

Akyu hpyi ai a marang e, hkam la lu ai lam mali hpe dum sai let nihtep nga lu na matu shakut sa wa ra ai lam Wa Sarabyin Francis tsun shadum da ai.

1. Karai Kasang hte nihtep nga ra ai.

Akyu hpyi ai a marang e Karai Kasang hte nihtep nga lu ai. "Akyu n hpyi ai jau gaw maza bang ai htawngpa hte mung ai; Shi a asak kaba ten du hkra hting hkang nna nga shalai la chye ai raitim, dai gaw maza htawngpa kata kaw sha rai na ra ai; Dai zawn re ai prat masa hku nga shalai ai hpe (mediocrity) yu maya prat hku sha nga ai re" nga nna Wa Sarabyin tsun shang lang da ai. Tinang galaw shut ai mara kaba a majaw hkrit tsang nna mara raw sakramentu sa hkam la ai lam n nga ai rai yang gaw (mediocrity) yu maya prat hta hkrat sum taw nga ding yang rang nga ai; akyu n hpyi ai majaw dai zawn re ai masa hta chyam chya taw ai rai nga ai, nga nna mung Wa Sarabyin matut tsun sang lang let shadum jahprang da ai.

2. Saradaw hte nihtep nga ra ai.

Tinang a Saradaw hte prinem n la ai, nihtep lam n galaw ai hte seng nna mung Wa Sarabyin shadum sadi jaw da nga ai. Shi gaw mara shagun ging ai wa re, hkrup sha ging ai wa re ngu tsun ai wa hkum nan hpe mung mara shagun ging ai wa tai nga ai. Langai hte langai mara shagun ging ai ngu tsun dang rang hkat ai yan gaw lahkawng yang gaw mara shagun ging ai yan rai nga ai, nga nna mung Wa Sarabyin shadum jahprang da ai. Saradaw gaw na a "kawa" re; dai re majaw shi hpe yu gawn u; shi hte nihtep hkra nga u; dai gaw shi hpe shamawk ai (lama ma ahkaw ahkang la mayu ai majaw shi hta n nga ai hpe tsun shakawn ai) hpe tsun ai gaw n rai nga ai; Kawa zawn hkam sha nna dai kawa hte rau nga ai, kawa hte seng ai hku nga ai hpe tsun ai, nga nna mung Wa Sarabyin sang lang da nga ai.

3. Jau ni lapran nihtep nga ra ai.

Jau ni a wuhpung wuhpawng hta n tsawm n htap dik ai lam langai gaw (gossip) shatan nhkan ai lam rai nga ai; prat bung manang ni a gawng kya ai lam hpe bau dum nna ndau shabra ai lam rai nga ai. Shanhte gaw na a magam rum, prat bung manang rai nga ai. Nawku jawng kaw pyi shatan nhkan galaw chye ma ni law law nga nga ai. Shara shagu hta dai zawn shada shatan nhkan tsun ai ni law law nga nga ai. Dai zawn shatan nhkan galaw ai lam ni hpe n sharin ya ga. Hpa majaw nga yang dai gaw anhte a prat hpe jahten nga ai.

4. Jau ni gaw Jau Ginwang na Nawku Hpung masha ni hte nihtep hkra nga ra ai; Karai Kasang a myusha ni hte rau nga ra ai.

Mungkan masha yawng hte nihtep nga ra ai hpe tsun ai mung rai nga ai. Hpung masha kanu yan kawa kaw nna jau tai wa ai hpe malap mat ai Jau ni hpe mu yang grai yawn ai, grai myit n pyaw ai lam San Pawlu Timothy hpe shadum da ai ga (2 Tim 1:5) hte, Wa Sarabyin Francis, bai shingdaw let Jau ni hpe shadum shadi jaw da ai. "Shanhte, Jau tai jawng ma ni, hpe shangai shaprat ya ai ni hpe tsaw ra chye hkra sharin ya mu; shanhte, Jau tai jawng ma ni gaw Jau prat hta hkawm sa na ma ai raitim, shanhte hpe shangai shaprat dat ai ni a prat hpe n mai malap kau ai; myit sawn hpaji (philosophy), Karai Hpaji (Thelogy) sharin hkam la nga sai majaw dai prat kaw na lawt mat sai, dai prat hte n seng sai ngu hkum sharin, hkum dawk bang ya mu; Karai Kasang a myusha ni a sama hpe hkum malap kau shangun mu, shanhte gaw dai ni a matu, dai ni hte rau nga na matu rai ma ai, nga nna mung Wa Sarabyin Francis shadum da ai.

Jau tai jawng ma ni hpe shapan shalat ai hta ahpa atang prat hta nga ai kyang lailen hpe aten galu shareng da ai a dingbai dingna hte seng nna mung tsun shadum da ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-11/pope-francis-prayer-mediocrity-rigidity-closeness.html