Wa Sarabyin Francis Cyprus hte Greece Mungdan De  Sa Du Gawan Na 

Wa Sarabyin Francis gaw sinna hkran  hkarang panglai grupyin Mungdan ni rai  nga ai Cyprus hte Greece Mungdan ni  de 2021 December shata praw 2 kawn 6 ya laman  hta sa du gawan na re ai lam chye lu ai.

Hkrun lam a madung yaw shada ai lam gaw bu htawt hkawm masha ni,  Orthodox Nawku hpung ni hte  matut mahkai kanawn mazum ai lam galaw  na matu hte dai mungdan ni a simsa lam hpe madi shadaw ya na matu re ai lam chye lu ai.

Wa Sarabyin Francis gaw Cyprus a muklung rai nga ai Nicosia kaw December praw 2-4 lam sa gawan na rai nna, Greece mungdan a muklung rai nga ai Athens hte Lesbos ni hta gaw December praw 4 kaw praw 6 ya du hkra sa du gawan na re hpe Vatican kawn ndau da ma ai.

Wa Sarabyin Francis gaw 2016 ning hta Greek mungdan Lesbos zinlawng kaw nga ai  bu htawt hkawm tsin yam masha ni nga ai The Moria Refugee Camp de lani mi sa du gawan ai lam galaw lai wa sai raitim, Greek mungdan daju de gaw ndai lang shawng ningnan sa du gawan na rai nga ai.

Wa Sarabyin sa du gawan lai wa ai The Moria tsinyam dabang gaw  Europe dan a kaba dik htum ai tsinyam dabang langai rai nga ai. Dai dabang gaw 2020, September shata hta wan hkru lawm mat wa sai rai nna ya ten hta hpat wat camp kaji langai bai hpaw da ai  lam chye lu ai.

Hkarang panglai ni hpe rap let bu htawt  hkawm ai tsinyam masha ni Italy, Spain, Greek hte Malta mungdan ni kaw grai law nga ai rai nna Cyprus  hta law dik nga ai lam shiga na ni hta madi madun da nga ai. January shata kawn October shata 31 ya du hkra rai yang Malta mungdan de bu htawt masha marai 464 nga nna, Cyprus zinlawng hta gaw marai 1515 nga ai lam Mungkan munghpawng rap daw kawn ndau da ai ma ai.

Wa Sarabyin Cyprus mungdan de sa du gawan na a lashum ga manoi gaw “ Makam masham lam hta langai hte langai pawnba n-gun jaw hkat lu na” matu rai nna, Greek mungdan de sa du gawan na lashum ga manoi gaw “Karai Kasang a mau hpa lam ni hpe anhte grau nna hpaw tsun dan lu u ga” ngu ai lam rai nga ai.

Lashum ga hpe sanglang dan ai hta Vatican shiga dap gaw, Greek mungdan kaw ana zingli hte nau nna ai ten hta sut masa lam yak hkak ai lam hkrum sha lai wa ai majaw Wa Sarabyin hkrun lam gaw Greek mungdan a shawng lam a matu nhtoi langai mi la sa wa lu na re lam madun da ma ai.

Wa Shara byin a hkrun lam hte seng nna kata lam hkum tsup ai hku bai ndau na re lam November praw 5 ya shani Vatican shiga dap kawn ndau da nga ai.

 Pope plans Dec. 2-6 visit to Cyprus and Greece - Catholic News Service