Wa Sarabyim Francis Sut Masa Lam Hta Yak Hkak Nga Ai Kun Dinghku Masha Ni A Matu Akyu Hpyi Ya Nga Ai Shiga

Lu sha gam ladaw laban bat ( 1 ) ya jahpawt na Casa Santa Marta Nawku Htingnu hta nawng jau ai missa hkungga hta, Wa Sarabyim Francis gaw Coronavirus ana zingli myit mat na matu, lam amyu myu hku ap nawng shakut nga ai kun dinghku masha shagu a matu, makam masham lam hta, prat masa lam hta, ngang kang let, shakut hkam jan nga lu mu ga matu, akyu hpyi ya ai re.

“Covid-19 ana zingli hpe shamyit kau lu na matu, tinang a prat hpe ap nawng daw jau nga ra ai majaw sut masa lam hta, mayak mahkak hkrum hkra nga ai masha ni a matu, akyu hpyi ya nga ga. Ndai  ana zingli a majaw, magam bungli ni hpe galaw nlu mat ai ni law law rai nga ma ai. De a majaw kun dinghku masha law law sut masa lam hta, jam jau nga ma ai sha n-ga, tinang kun dinghku sak hkrung lam hta, yak hkak kam kaba hkrum hkra nga masai re. Dai majaw anhte ni dai zawn matsan jam jau ai mang hkang kaba hpe, hkrum sha nga ai kun dinghku masha ni a matu, akyu hpyi ya nga ga ai re” nga nna Wa Sarabyim akyu hpyi ya nga ai.

Wa Sarabyim a mungga hta “ Makam masham lam, Hkam sharang hkam jan lam, Myit dating n gun shaja ia lam ni a matu, akyu ja ja hpyi ra ai “ nga nna shadum n gun jaw da nga ai.

Yawhan a kabu gara shiga laika 4: 43 -54 hta na, Madu Yesu Galilee mung na Canan mare hta, Du wa hpyi shawn ai hte maren, machyi taw nga ai shi a kasha , shamai ya ai lam hpe myit sumru let, ndai lam ni hpe, shingdaw shadum jahprang da nga ai.

“ Anhte a makam gaw, anhte a akyu hpyi ai a, ahkyak ai ningpawt ninghpang re “ nga nna Wa Sarabyim tsun da nga ai, ‘ Akyu hpyi ai ga law law wa masha a n gup a ga kaw na pru nga ai” Raitim, dai akyu hpyi ga ni, myit masin salum kata na pru wa ai makam myit ni nrai nga ai majaw, Yawm ai, Nhkum tsup ai makam she rai nga ai “ nga nna, Marku a laika 9:23 hta na, “ Yesu ga nnag rai lu n-yang gaw! kam sham ai myit rawng ai wa gaw, hpa mung rai lu na ra ai” ngu nna, shi hpe tusn wu ai” nga ai shadum ga hpe la kap nna tsun da nga ai.

Covid -19 Corona Virus ana zingli a majaw, kun dinghku masha shagu sak hkrum lam hta, mayak mang hkang hkrum hkra nga ai hta na, lawt lu na matu, Wa Sarabyim a kyu hpyi ya nga ai hta jawm pawng let, akyu hpyi ya nga lu u ga yaw shada let, Vatican shiga dap kaw 2020 march shata 23 hta shana da ai hpe anhte RVA Kachin Service kawn shalai shana shabra dat ga ai.

#churchnews #covid-19 #vatican #rvakachinservice