Wa Sarabin: Madu Shangai Wa Ai Gaw Simsa Lam Shangai Wa Ai Re

Jesus Born

December 25, Hkristmas poi laban shani, Wa Sarabyin Francis, Hkristmas gaw "Urbi et Orbi blessing (to the city and the world) "Mare kaw na mungkan chyam hkra" chyeju hpring ai lam re nga nna tsun da ai. Hkristmas Missa Hkungga hpe Vatican, San Peter Basilica Nawku Htingnu kaba hta nawng jau ai rai nna, dai shani, Wa Sarabyin Francis mungkan ting de, Hkristmas mungga htawn tsun shana shabra dat nga ai. Masha hkum shagu kaw na, kun dinghku, htingbu, mare, myu, mungdan, mungkan mungdan shara shagu simsa lam chyam bra wa na matu rai nga ai.

Karai Kasang Anthe Hte Rau Rai Nga Ai (God With Us) Madu Yesu Hkristu gaw anhte a ka-ang, lapran e shangai wa ai. Anhte a shani shagu sak prat hta anhte hte rau nga na matu, anhte hte rau hkam sha na matu, kabu pya ai, yawn hkyen ai, myit mada lam hta, hkrit tsang lam hta; yawng hkam sha lawm na matu rai nga ai. Karai Kasang gaw matsan dik masa hku shangai wa ai, matsan ai ni hta matsan grau ai hku shangai wa ai; anhte a masin salum chyinghka sa akawk na matu shangai wa ai.

Karai Kasang hpe mu lu na kumla anhte hpe jaw ya sai. Sagurem ni hpe zawn anhte marai hkum shagu hpe, Shi a hkye hkran la magam hpe ndau shana ya na matu saw shaga nga ai. N'htoi jaw ya ai, kabu pyaw lam jaw ya ai, simsa lam jaw ya ai. Dai hta shang lawm lu na matu anhte kam sham na hpe hpyi shawn ta ai. Dai makam hpe mung shi hkum nan jaw bang ya ai. Anhte hkap hkam la na sha ahkyak ai.

Yesu Hkristu gaw simsa lam re; shinggyim hkum sa la ai, nni nkri hkam ai, si hkam ai, bai hkrung rawt ai a marang e, simsa lam hpaw da ya ai; dai lam hta hkawm sa ra ga ai.Yesu a hpang hkan ai gaw li ai kantang hpai let, yak hkak jam jau ai lam hta hkawm sa ai rai nga ai.Gumrawng ai, arawng aya ra marit ai, dip lu dip sha ai, hte manghkang shalaw ai lam ni gaw ndai prat na dingbai dingna kaba rai nga ai. Hkristmas hta dai zawn re ai dingbai dingna ni hpe yen seng kau ra ai. Katsi katsang rai majan hpe shabyin ai mung shinggyim myu ni hpe hkra machyi shangun nga ai.

Hkristmas hpe kaja wa ra sharawng ga ai rai yang, simsa lam hpe ra sharawng ga ai rai yang, Bethlehem hpe yu ra ai, ma Yesu a myiman hpe tau yu ra ai, shi gaw anhte a matu shangai wa ai, mungkan simsa lam a matu shangai wa ai. Mungkan shara shagu hta simsa lam hpe ra sharawng nga ma ai.Tsin-yam hkrum yak hkak jam jau nga ai ni hpe hkrak teng sha yu lakawn ra ai; Ukraine mung shawa masha ni mung anhte a hpu nau nau na ni hkrai rai ma ai. Shanhte gaw nsin hta rai nga ma ai, majan hta rai nga ma ai, dum nta hte tsan gang mat ai shaning hku rai masai.

Karai Kasang gaw anhte hpe myit hprang shangun ya rit ga; Shaloi, matsan jam jau hkrum nga ai ni hte myit langai hta sha rau rai nga ai hte shanhte hpe tau chye na ya let garum pawn ba la na rai ga ai. Ahkang aya kaba ai ni, power kaba ai ni laknak ni hpe shazim kau lu mu ga, majan hpe jahkring kau lu mu ga.Hkristu Madu gaw Hkristan wuhpung wuhpawng lapran nga nga ai, makam n bung ai masha shagu a lapran mung nga nga ai, yawng a matu shangai wa ai.

Bethlehem hpe myit dum ga; dai gaw lusha nga ai shara re; kaw si hpang gara ai dai ni na ma kaji ni law law rai nga ma ai. Maga mi de majan a matu laknak ni a matu ja gumhpraw hpe jai jahtum nga ma ai. Ukraine majan hpe maram yu ga; kaja wa sha, mungkan hta kaw si hpang gara ai ni law hta law jat wa nga ai. Afghanistan ni hta mung kaw si hpang gara ai ni grau grau she law jat nga ai.Majan hta jai lang ai laknak ni hpe shanhte a matu lusha shatai la ra ai. Laknak a matu ja gumhpaw jahtum n mai sai; shinggyim masha ni yak hta yak rai wa sai. Simsa lam hpe gaw de ra sai.

Myit hkrum ginlum kahkyin gumdin nga ra ai. Yawng a matu ahkyak ai lam re. Shingtai nga ra ai ni, chyahkrai ma ni, asak kung dinggai dingla ni, hkyuk htawng hta rawng nga ai ni, ndai ni yawng gaw hpu nau nau na ni hkrai rai ma ai.Shanhte a matu salum chyinghka hpaw da ga. Bethlehem hta Karai Kasang asan sha madun da nga ai. Karai Kasang a tsaw ra ai hta anhte sak hkrung nga pra ra saga ai. Madu Yesu a hpang hkan nang let, shi a hkum tsup ai lam gaw yawng a matu rai nga ai.

 

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-12/pope-at-urbi-et-orbi-the-lord-s-birth-is-the-birth-of-peace.html

 

Add new comment

16 + 4 =