Wa Jau Peter Lazum Naw Bawk A Hkam Sha

Myitkyina Kahtawlik Sasana Katha jau ginwang up,Wa Jau Peter Lazum Naw Bawk a jau prat ( 25 ) ning hpring chyeju dum Jubali Missa hpe ( October 11, 2023 ) ya shani Myitkyina San Columban Nawku Htingnu kaba hta angwi apyaw galaw la lu sai.

Katha jau ginwang hta ginwang up lit magam hpe gun hpai taw ai rai tim, shi a chyeju dum Jubali poi hpe Myitkyina jau ginwang de galaw ai lam gaw, Sagaing ginwang rai nga ai Katha mare hta ya ten na Myanmar mungdan masa n pyaw ai lam ni a majaw Katha kaw poi galaw na n manu ai, jinghku jingyu ni hte kaga shara de na nawku hpung masha ni sa du yang yak ai lam ni grai law ai majaw shi a dum nta buga mung rai nga ai Myitkyina jau ginwang de galaw byin ai re lam tsun dan ai. 

Kade nna ai aten hta sha shi a chyinghkai Kanu n nga mat ai, mung masa n pyaw ai, yak hkak ai lam ni law law nga ai majaw Jubali poi hpe n galaw na myit ai rai tim Myitkyina ginwang up Wa Jau John Galang La Raw a n'gun jaw ai, bai shi a chyinghkai kanu nan mung lai wa sai shaning law law aten kaw nna Wa Jau a Jubali galaw na matu gumhpraw mahkawng da ai sen ( 3010000 )  wa jau hpe ap jaw da ai lam ni a majaw ( 25 ) ning hpring chyeju dum Jubali poi galaw byin ai lam re hpe mung chye lu ai. 

Wa Jau Peter Lazum Naw Bawk gaw asak ( 25 ) ning hte jau tai wa ai rai nna Myitkyina jau ginwang hta shawng nnan asak kaji dik hku nna jau tai wa ai jau langai mung rai nga ai.