Wa Jau Peter Lahpai Hkun Nawng Jau Tai Wa Hkra Shaga La Hkrum Ai Lam

March 22.2022  ya shani Panghkak jau ginwang, Loije Muklum na St. Paul nawku jawng wang kaw Manmaw Saradaw ginwang up Wa Saradaw Raymond Sumlut Gam a lata hta htani htana jau aya hkam la sai Wa jau nnan Peter Lahpai Hkun Nawng  gaw Panghkak Jau Ginwang, San Columban Sara ninghtawn ,Sut Ngai mare kaw shanu  nga ai Slg. Lahpai Hkun Seng hte Jan. Lucia Sumlut Roi yan a kasha rai nga ai.

Dum nta kaw kanu yan kawa gaw makam masham n bung ai, kawa gaw Hkalup Hpung ( KBC ) rai nna kanu gaw Kahtawlik makam masham re.

Kanu yan kawa gaw Hkalup makam masham hku hkungran da ai rai nna, hpang e she kanu hpyi shawn ai majaw kahtawlik makam masham hku nna gayau hkungran lekmat hpe la da ai.

Wa jau yan nau ni gaw kaji daw ten hta hkalup hpung de madung dat nna hkan ai, kawa gaw hkalup hpung de poi kaba ni nga jang grai sa lawm ai, dai aten wa jau mung ma naw re majaw poi sharawng nna kawa kaw law malawng hkan nang byin ai, dai re majaw kaji daw ten hta Hkalup hpung hte seng nna grau chye na ai lam nga ai. Kahtawlik hpung gaw dai aten hta poi galaw na yak hkak ai lam ni nga ai, ginjaw gaw Panghkak de re majaw mare buga hkan poi galaw ai lam nau n nga ai. Raitim wa jau a kanu kahtawlik nawku jawng de shaga sa jang gaw hkan nang ai.

Wa jau gaw asak ( 14 ) ning daram re ai aten hta she kashin kamun hkam la ai, raitim kashin kamun a lam hpe atsawm chye na nna hkam la ai gaw nre, Wa jau a kanu gaw nawku jawng de woi sa nna kashin kamun hkam shangun ai majaw hkam la byin ai. Raitimung dai aten kaw nna Kahtawlik makam masham de du mat wa sai re lam Wa jau tsun dan ai.

Shi kashin kamun hkam la ai gaw Wa jau Raymond Sumlut Gam ( ya Saradaw Raymond Sum Gam ) Maibat kaw ginlung Hkrismat sa galaw ai shaloi hkam la ai. Dai gaw Wa jau Hkun Nawng a matu shawng nnan lang na Wa Jau hpe mu yu ai mung rai nga ai.

Wa Jau hpe mu ai shaloi ma langai a myit hta hkam sha lu ai gaw Wa jau gaw shang gang hpun da ai, mara raw ai, missa hkungga nawng ai, mungga hkaw ai, masha a shawng kaw nga nna woi awn ya ai hpe mu mada ai shaloi grai yu sharawng mat ai. Jau ngu ai gaw ndai hku rai nga ai ngu myit hta hkam sha ai, shi n chye na ai lam kanu hpe san yu ai shaloi jau ngu ai ni gaw grai san seng san pra ai ni re, wenyi magam hta mung, masha hpe shamai shatsai ai lam hta mung shaman chyeju lu ai, ahkaw ahkang lu da ai ni re ngu nna shi chye ai hku tsun dan ai.

Dai shani kaw nna jau langai hpe mu mada wa ai lam gaw jau ni ngu ai gaw chye machyi na mung n shadu ai, chye si na mung n shadu ai,grai san seng san pra ai ni re ngu myit hta hkam sha mat ai. Jau langai tai mayu ai myit rawng ai majaw kanu hpe jau mai tai na kun ngu san yu yang, kanu mung mai tai ai, raitim jau tai na matu gaw makam masham chye ra ai, laika hpaji chye ra ai, dai ni chye na matu gaw bawda sa nga ra ai ngu tsun ai majaw asak ( 14 ) daram re ai aten hta Panghkak krung kaw wa jau ni hpaw da ai bawda sa nga hpang ai.

Asak kaba ai hpang she Kahtawlik nawku jawng de sa ai re majaw gaya ai, nawku jawng sa tim shawng hkan n gwi dung ai, kawa kasha mung atsawm nchye galaw ai, kawa kasha galaw yang lata grai ja ai zawn nga, grai galaw yak ai zawn  hkam sha ai. Raitim bawda sa nga ai hpang kaw na kawa kasha mung atsawm sha chye galaw mat ai, akyu hpyi ga ni chye mat ai, mara raw sacramentu hpe hkam la lu ai,dai shaloi shi a myit hta asan sha nga hkam sha mat ai majaw matut manoi rai tsang ( 9 ) du hkra bawda kaw nga ai. Tsang ( 10 ) du ai shaning jau tai jawng de shang nna makam masham lam grau chye na mat ai majaw jau tai na matu grau nna shakut mayu wa ai.

Raitimung jau tai na matu shakut ai hkrun lam ntsa hta yak hkak ai lam ni grai nga wa ai. Brother tai nna jau prat hpe sung sung li li chye na wa ai,kaja wa tinang a prat hpe sak jaw ap nawng nna galaw ra wa ai ngu ai hpe chye na wa ai shaloi gaw kalang lang hkrit wa ai zawn nga hkam sha ai, tinang prat hpe prat tup kaja wa lu galaw na I, lu ap nawng na I nga nna myit ung ang ai lam ni hkam sha wa ai. Myit nlu dawdan ai zawn nga byin wa ai, dai zawn hkam sha wa ai aten shi a yak hkak ai lam kanu yan kawa hpe nau n tsun dan ai, hpa majaw nga yang kanu mung laika n chye ai, kawa mung hpung n bung ai re majaw tsun dan tim shanhte hpe myit puba shangun ai lam grau tai na re ngu myit nna chyoipra hkum kaw akyu hpyi ai, rosary hti nna myit shalan la ai. Myit daw dan yak wa ai, myit ung ang wa ai aten ni hta tinang kam mai ai, wang lu wang lang tsun dan mai ai jau ni kaw sa nna tsun dan ai. Dai shaloi jau langai kaw sa nna san ai, myit hta ung ang taw nga ai lam ni yawng hpe mung tsun dan ai, shaloi dai jau n gun jaw ga tsun dat ai gaw nang hpa myit hkumru u, kaja wa nang na shaga la ai lam gaw ndai nan re ,Karai Kasang a shaman chyeju ndai lam nan re nga jang nang hpa n myit taw ra ai, nang kade yak hkak jam jau ai raitim jau tai wa na ra ai, lama na na shaman chyeju gaw jau prat n re, kaga lam re nga jang mung shi hte shi rai mat wa na ra ai, Karai Kasang hpe kamsham nna ding yang shakut u ngu, n gun jaw ga tsun nna akyu hpyi shaman dat ya ai. Shaman hkam la ai hpang kaw nna myit hta a san nga hkam sha nna jau prat ngu ai lam langai hpe sha myit ngwi myit pyaw ai hte daw dan la lu ai majaw daini jau langai tai wa ai rai nga ai.

Jau prat a matu lata da ai chyum mungga daw gaw ( Shk 100: 2 ) hta na “Madu Karai Kasang hpe kabu gara ai hte daw jau nga mu” ngu ai chyum daw rai nga ai. Ndai hpe lata da ai lam gaw jau prat hpe lata la ai gaw kadai a shadut ai lam, kadai galaw shangun ai majaw mung n re, ngai hkrai sharawng nna, ngai nan tai mayu nna lata la ai re,  dai majaw ndai jau prat hkawm sa nga ai ten hta e yak ai, jam jau ai, myitru myit tsang hkrum wa ai aten ni hta mung kadai hpe aput angun, pawt sindawng, n ju n dawng na lam n nga ai hte jau tai aya hpe hkam la lu ai gaw Karai Kasang jaw ya ai laksan shaman chyeju re, dai majaw jau prat hta hkawm sa nga ai ten jam jau ai, pyaw ai galoi aten hta raitim Karai Kasang hpe kaja wa sharawng awng ai myit masin hte daw jau nga lu na matu lata da ai rai nga ai.

Panghkak jau ginwang hta Jinghpaw mung hta Saradaw lahkawng hte jau ni marai ( 6 ) tai wa ai jau ginwang mung rai nga ai.

Shiga - Julia Ja Ing