Vatican kaw na Francis Collins hpe Templeton shagrau kumhpa hte shagrau ai shiga!

2020, May 20 ya shani, shaning shagu jaw ai Templeton Prize hpe 2020 shaning  shagrau hkrum na wa a mying shana dat ai. Shi a mying gaw Vatican kaw na amyu ru sai hpaji ninghkring  hte tsi du kaba Dr. Francis Collins rai nga ai. Ndai zawn kumhpa shagrau ai gaw makam masham hte myit sawn sumru ai ladat lahkawng hpe sam maram pawng hpawm da lu ai lam nga ai hpe madun dan ai lam nan rai sai.

Dr. Collins gaw ya na tsa ban nnan hta amyu ru sai hte seng ai masing hpe woi awn ai re ngu mying dan hkung ai wa rai nga ai. 2009 shaning kaw na nan, America kaw na Mung shawa tsi rung kaba hpe woi awn taw nga ai wa rai nga ai.2006 hta hpungtang hpaji ninghkring ni kam ai shadan shadawn ai mu mada lam gaw Karai a ga ngu ai “The Language of God” hta re ngu ai laika buk hpe htuk shapraw da ai. Dai laika buk a marang e masha law law shi hpe chye wa ma ai lam chye lu ai. 2009, October shata hta  Sarabyin rung kawn hpaw da ai hpungtang hpaji sharin jawng (Pontifical Academy of scineces) kaw  magam gun na matu Wa Sarabyin Benedict XVI lit shatsam da ai hkrum wa sai re.

Vatican shiga dap hte san htai ai shaloi 2020 shaning na Templeton prize shagrau hkrum ai majaw mau kabu ai lam tsun dan wa ai.

Shi tsun ai “Ndai kumhpa shagrau hkrum na jahpan rawng na pyi galoi n myit wa ai.” Shi gaw shi hkum shi Karai hpaji ninghkring ngu galoi n shadu wa ai. Shawng de, Mother Theresa, Billy Graham hte Saradaw kaba Desmond Tutu ni zawn re ai ninghkring ni hpe shagrau lai wa ai a marang e Shagrau jaw ai company a matu arawng la hpa rai nga ai nga nna mung matut tsun da ai.

Ndai Templeton shagrau kumhpa a marang e, Dr. Francis Collins a magam bungli gaw hpungtang hpaji lam yan hte Makam masham lam yan lahkawng yan hta katsi la hpa masat ding sat nan rai nga sai. Hpungtang hpaji lam yan hte Makam masham lam yan lahkawng gaw langai hte langai san san rai nga taw chye nga ai rai tim, Dr. Collins gaw dai lam yan lahkawng yan hpe hkrum shaga shangun lu ai ngu kam ai wa rai nga ai. Hpa majaw nga yang dai lam yan lahkawng yan gaw Karai Kasang ka da ai laika buk langai hpe sha jai lang nga ai majaw re shi tsun da nga ai.

Shi tsun ai “Karai Kasang anhte hpe laika buk lahkawng jaw da ai ngu shadu ai; langai gaw ngai shani shagu hti ai Karai mungga ngu ai ‘Ja Chyum laika buk” rai nga ai; langai gaw Karai magam hte seng ai “hpan da magam” laika buk rai nga ai. Dr. Collins gaw Hpungtang hpaji ninghkring langai mi hku nna, Karai a hpan da magam hpe manu shadan ai hte hpan da hkrum yawng gaw Karai Kasang hpe nawku ai hta akyu jashawn na matu rai nga ai ngu hkam la da ai.

“Wa Sarabyin Francis a matsun laika mungkan shingra maka makawp lam hte seng ai “Laudato Si” gaw Karai a hpan da magam chyum laika buk hta ru pawt tawn ai rai nga ai. Karai Kasang nga nga ai lam hpe hpung tang hpaji masa lam yan hte dan dawn ai hku mahtai tam madi madun nlu ai rai tim, shingra maka/tara lam hpe hka ja ai a marang e anhte ni chye mayu ai lam hpe sang lang dan lu nga ai,” ngu Dr. Collins tsun sang lang da ai.

Ndai shaning ni hta Templeton Prize shagrau ra ai hte seng nna Dr. Collins shi a ning mu hpe tsun da ai. Covid -19 makawp tsi tam sawk sagawn htuk shapraw ai wa she ndai shagrau kumhpa hkam la na wa rai nga ai ngu tsun shapraw da nga ai. Shi hkum nan mung Covid -19 makawp tsi tam sagawn ai hta shi a aten yawng ngu na daram jaw da ai ngu ka da ai. Ya na daram matsan jam jau hkrum ra ai hpe anhte hta sha-ang nna ahkang jaw ai gaw Tsaw ra matsan dum lama ai Karai Kasang hpe kam shut na lam bying shangun ai ngu mung ka da nga ai.

“Kamsham ai ni hte n kam n sham ai ni yawng hkam sha ra nga ai matsan jam jau lam hpe Karai Kasang hpa majaw ahkang jaw ai kun ngu ai ga san gaw htai yak di ai ga san rai na sai. Dr. Collins a makam gaw “Karai Kasang anhte a yak hkak jam jau lam mahkra hpe chye na hkam sha lawm ai” ngu shi hpe tsun nga ai. “Yesu Madu gaw ngai sumru nlu ai hku wudang ntsa hta yubak hkam si hkam lai wa sai. Dai majaw ngai a matsan jam jau hte mayak mahkak lam hkrum ra ai lam Karai Kasang hpe tsun da shara nnga sai” ngu shi a makam hpe mung hpaw tsun da ai.

Dr. Collins gaw shi a tsi hpaji hte matsan mayan machyi makaw hkrum ai ni hpe tsi tsi lajang ya shagu hta shi a aten ma hkam nna tsi tsi lajang ya ai  Yesu Madu hta sha myit mada lam tawn da ai ngu tsun da ai. “Anhte ni arau galaw na matu shaga la hkrum saga ai. Covid -19 makawp tsi hte rau kaga tsi mang hkang ni hpe hparan na matu Karai Kasang gaw hpungtang hpaji ladat hpe jai lang nna tam sagawn la na matu anhte hpe lit shatsam da nga ai,” ngu nna Dr. Collins tsun da ai.

“Ndai tsi manghkang hparan lu na matu ngai na aten ma hkam ai a majaw mung myit malai nlu ai,” ngu mung tsun da ai.

Templeton Prize gaw hpungtang hpaji ninghkring kaba John Templeton a matsan mayan ni hpe garum ai laklai mai kaja magam bungli galaw ai ni hpe shagrau na matu san da ya ai shagrau kumhpa rai nga ai. Dai zawn laklai mai kaja magam bungli mung hpungtang hpaji jai lang ai ni hpe lak san shagrau ai kumhpa rai nga ai.

Dai kumhpa hpe lu da ai ni gaw (1) Mother Teresa, 1973, (2) Billy Graham, 1982, (3) Dalai Lama, 2012, (4) Desmond Tutu, 2013, (5) Tomas Halik, 2014, (6) Rabbi Lord Jonathan Sacks, 2016, (7) Jordan hkawhkam Abdullah, 2018 ni rai ma ai. 2020 shaning na Templeton prize shagrau hkrum na Francis Collins hpe dai ning jahtum daw de galaw na shagrau lamang hta shagrau sa wa na lam hpe Vatican shiga dap kawn ndau da nga ai.

11 June 2020, 14:08

https://www.vaticannews.va/en/world/news/2020-06/francis-collins-templeton-prize-interview-language-of-god.html

Translated By Fr. Patrick Hkawng Yae

https://www.rvasia.org

Website - kachin.rvasia.org/

Social Media -facebook- RVA kachin, wechat, viber, Instagram, Twetter, youtube