Vatican De Wa Sarabyin Bai Du Wa Sai Shiga

African dan mungdan masum rai nga ai Mozambique, Madagascar hte Mauritius mungdan ni de sa du gawn ngut nna, bat lahkawng ya shana maga daw hta Vatican de Wa sarabyin Francis bai du wa sai rai nga ai.

Vatican shiga dap kaw nna ndau shapraw ai shiga hta, Wa sarabyin a nbungli bat lahkawng ya, Sept 10 ya shana maga daw hta Roma mare Ciampino nbungli pa de du yu hkrat wa ai, maigan mungdan hkrun lam kaw nna bai du wa shagu shawoi galaw ai zawn sha Vatican de garai nwa shi yang San Mary Major nawku htingnu kaba de wa shang nna sasana hkrun lam awng dang sai majaw chyeju akyu hpyi ai lam Wa sarabyin galaw ai, San Mary Major nawku htingnu kaba kata na Nu Maria a man hta nam pan shabawn wa tawn ap ya nna, jahkring mi aten la akyu hpyi ai lam Wa sarabyin galaw lai wa ai, dai ngut nna she hkrun lam kaw nna pu ba ai lam ni nga ai majaw hkring sa la na matu Wa sarabyin Vatican de maw daw hte wa mat ai, nga nna Vatican shiga dap kaw nna ndau shapraw da nga ai.

Ndai lang na Wa sarabyin a 6 ya aten la nna Afircan dan mungdan 3 de hpung gawan sa ai hkrun lam gaw mai gan mungdan ni de du gawan sa ai 31 lang ngu na Wa sarabyin Francis a hkrun lam mung rai nga ai.

Source- Vatican News

#rvakachinservice

#aungnanmkn