Valentine’s Nhtoi Shani Myitkyina Kahtawlik Ramma Kaba Ni Jahkrai Ma Jawng De Alu Sa Galaw

Hku hkau ai Ramma shada da bawngban jahkrup nna tinang lu lawm dangdi lu ai daram jaw bang ai alu ni hpe mahkawng nna yak hkak nga ai Jahkrai Ma Jawng de ya na zawn sa garum ai re lam chye lu ai.

“ Hpu nau shada garum shingtau chye ai myit grau rawng wa na matu hte tinang hkam la lu ai kaw na alu jaw chye ai akyang lu wa na matu, kan bau magam bungli, sut masa lam yan ni hta tsap taw nga ai manaw manang ramma ni hpe zinlum nna ya na zawn alu jaw byin ai re lam, yawng mung aput apai nnga ai sha n-gun mi alu rai shang lawm ai majaw manang ni yawng hpe grai chyeju dum ai” nga nna ndai lamang hpe woi awn ai Shadang Zaw Awng (Ko Zaw Aung) tsun lai wa ai.

Ndai lamang hta Ramma ni marai 20 jan shang lawm nna jahkrai Ma Jawng de Gumhpraw Alu – 700,000Ks tup hte dai shani Ma ni hpe muk hte dwi hpa ntsin ni jaw sha lu sai lam chye lu ai. Ma ni hpe ningmu jahpaw hpaji jaw  Mungga shaga ya ai lam, Saint Valentine’s Day a lachyum ni hpe tsun dan ai lam ni mung galaw lai wa ai.

“Anhte ni gaw kanu kawa n lu ni hte lam amyu myu a majaw kabai da hkrum ai Ma ni hpe mahkawng da nna shara jahkrat nga ai lam sha re,  malu masha hte ndai ma ni a galu kaba wa na lam mahkra hpe gaw alu madu ni garum madi shadaw ya ai re, dai ni ramma ni anhte ma ni hpe sa garum ai majaw ndang tsun hkra chyeju dum ai, ramma ni langai hpra a ntsa Karai Kasang grau nna shaman ya uga” nga nna ma ni hpe woi yu nga ai Reparation Mama Maria Shanghkyen Ja Ra tsun lai wa ai.