US Gumsan Magam Usa George H. W. Bush Nnga Mat Wa Ai Majaw Yawm Hkyen Lawm Nga Ai Lam Wa Sarabyin Yawn Lahpu Laika Shagun Jaw

Asak 94 ning rai sai American Mungdan Gumsan Magam Usa George H. W. Bush lai wa sai Nov shata 30 ya shani nnga mat wa sai hte, makoi mayang lamang kaba hpe Mungdan asuya lit la nna Washington DC nawku htingnu kaba hta galaw lai wa ma ai. Gumdan magam Donald Trump hte hpawn asak naw hkrung nga ai American Mungdan Gumsan Magam usa ni marai 4 mung du lawm nga ai makoi mayang hpawng kaba de, Gumsan Magam Usa George H. W. Bush nnga mat wa ai majaw yawm hkyen lawm nga ai lam Wa sarabyin Francis kaw nna lahpu laika shagun jaw da tai rai nga ai.

Wa Sarabyin a malai Vatican amu madu Cardinal Pietro Parolin ta masat htu nna shagun jaw da tai wa sarabyin ai yawn lahpu chyenan laika hta, “Gumsan Magam Usa George H.W. Bush nnga mat ai shiga na lu ai majaw yawn hkyen lawm nga ai, ngam nga ai dum nta masha ni a matu akyu hpyi ya nga ai, gum san magam usa Bush a Wenyi Karai kasang a tsawra ai hta ban sa nga lu ga, yawn hkyen hkrum nga ai ni yawng hpe mung shalen shabran  ai n gun atsam hte simsa ai shaman chyeju Karai Kasang jaw ya u ga,” nga nna akyu hpyi shaman dat ya nga ai.

Ndai wa sarabyin a yawn lahpu laika hpe lai wa sai bat masum ya shani galaw ai makoi mayang lamang kaba hta hti shana ya lai wa ai re, nga ai.    

Lai sai bat masun, December praw 5 ya shani, Washington DC Nawku Htingnu kaba hta Mungdan asuya woi awn galaw ai makoi mayang lamang kaba galaw ngut ai hpang, lup makoi ai lam hpe gaw shi a buga rai nga ai Texas mungdaw hta lup makoi na rai nga ai majaw, lamang ngut ai hpang jang gumsan magam uasa George H. W. Bush a hkum tsawp moi mang hpe Texas mungdaw de htaw hpai mat wa sai rai nga ai.

Nnga mat wa sai Gumsan Magam George H.W. Bush gaw 1989 ning kaw nna 1993 ning du hkra American Mungdan Gumsan Magam galaw lai wa ai rai nga ai.

Source : Vatican News