UNICEF Hte KMSS Ni Galaw Na Hka Hte Makau Grup Yin San Seng San Pan Lam Hpe Hkrang Shapraw Sa Wa Lu Na Matu Jahkrum Bawngban Hpawng Galaw

United Nation International Child Emergency Fund ngu ai Mungkan ting na ma ni hte seng ai ahkyak ahkyak garum ningtum wuhpung Unicef hte Myanmar Mungdan Kahtawlik Nawku Hpung Shinggyim garum ningtum hpung KMSS ni pawng hkawm let rau jawm galaw sa wa na Hka hte  makau grup yin san seng lam (Wash Project) ngu ai  ရေနှင့်ပတ်၀န်းကျင်သန့်ရှင်းရေး၊ တကိုယ်ရေသန့်ရှင်းရေးဆိုင်ရာစီမံကိန်း masing masa hpe hkrang shapraw galaw sa wa lu na matu tau hkrau jahkrum bawngban ai hpawng hpe lai wa sai January 31,2020 ya shani Myikyina, Awng Nan San ColumbanNawku Jawng,  Jau ni a zuphpawng gawk hta galaw lai wa ma ai.

Zup hpawng  hta Myitkyina Sasana sagurem wa, Wa Saradaw Francis Daw Tang hte seng ang ai ginwang up Wa Jau ni, Jinghpaw mung shinggyim wuhpawng hte seng ai hkring mang daju (လူမှုရေး၀န်ကြီး) hte asuya Hpaji magam dap na salang ni, buga shara shagu na Wash project hte seng ai  dat kasa ni hte Wash Project kaw na karuna magam gun ni sa du shang lawm lai wa ma ai.

Unicef hte KMSS ni jawm galaw na ndai masing hte matut mahkai nga ai seng ang buga ginra, jawng hkan na  uhpung wuhpawng ni grau nna ni htep ai hku  jawm pawng  sa wa lu na matu hte masing masa hpe ta tut hkrang shapraw lu hkra hkum zup ai hku bawng ban jahkrup la lu na matu ya na zawn zuphpawng galaw ai re lam chye lu ai.

KMSS kaw na Warsh Project ningbaw Shy.Shagyen Ja Bu tsun ai hta, (n sen file), Ndai lamang gaw, Jau ginwang kata hkan na Jawng ni, Boarder ni, grau nna hpyen yen kata hkan na ma ni lung nga ai jawng ni hta ma ni a san seng san pan lam hpe hpaji jaw garum ya na matu, shawng nnan Sharin sara saranum ni hpe majat hpaji jaw ai lam galaw mat na masing re ai lam tsun lai wa ai.

Jahkrum bawngban ai lam hta, Wa Saradaw , Jinghpaw Mung Shinggyim wuhpawng hkring mang daju hte Unicef na na  slang ni hku nna  hkalum mungga  tsun ai hta

Buga shara shagu hkan nga ai mung chying shawa masha hte Hpaji sharin jawng hkan nga ai jawng ma ni yawng ngwi pyaw hkam kaja ai hte makau grup yin, hkum ding san seng lam lu na matu Nawku hpung hte Asuya ta gindun jawm pawng nna mung chying shawa masha ni a byin nga masa lam ni hpe mu mada chye ya let ta tut hkrang shapraw galaw sa wa na ra nga ai.Ya na zawn tau hkrau jawm jahkrup bawng ban ai gaw shawng lam a matu ngang kang ai lamang rai nna, yawng ta hkyin dun let rau jawm galaw sa wa na re lam

tsun lai wa ma ai.

Ndai masing gaw, Jinghpaw mung kata kaw nga ai Hpyen yen camp hkan na jawng ni, Nawku hpung kawn yu reng nga ai Ma shalet jawng hte Boarder jawng ni  hta hka hte makau grup yin san seng lam, ma ni a hkum ding nun san seng san pan lam ni a matu ra kadawn nga ai arung arai hka dum nam ni madi shadaw garum ya lu na matu hte san seng san pan lam hte seng nna sharin Sara/Saranum ni hte, jawng ma ni hpe majat hpaji jaw ai lamang ni galaw ya na matu re ai lam, grau nna gaw Asuya kawn ndep nhkap ai Ginra hkan na ma ni a hkum dingnun san seng lam ni hpe hpaji jaw garum ya lu na matu re ai lam Unicef kaw na Wash Cluster Sara Aye Win tsun lai wa ai.

Sara Aye Win hku nna ndai project awng dang lu na matu ahkyak dik gaw, project galaw sa wa na Buga Ginra hkan na Ginwang up jau ni hte ndai lamang hpe ta tut lit la galaw na magam gun ni hta lit kaba nga ai lam, gara hku ladat hte galaw sa wa ra ai lam ni hpe zuphpawng hta galu galang tsun sang lang ai lam, ga san ga htai galaw ai lam ni mung galaw lai wa sai re.

Ndai masing hpe Jinghpaw Mung kata, Danai, Hpakant,Chipwi,Waingmaw, Mogawng, Monyin, Manmaw, Momauk Ginwang ni hta shata 12 tup galaw mat na rai nna 2019 shata man 12 kawn 2020 ning shata man 10 du hkra shawng nnan galaw mat na re lam lam chye lu ai.

Thomas