UN Zuphpawng Hta Holy See Wa Sarabyin Kawn Bu Htawt Hkawm Ai (Migrants) Ni A Nga Sat Nga Sa Sari Sadang Hpe Makawp Maga Na Matu (International solidarity) Mungdan Ga Daga Sai Ninghtan Myit Hkrum Rap Ra Uhpung Ra Ai Lam

Geneve hta e Shinggyim ahkaw ahkang hte seng ai kongsi (United Nation Human Right Council) tsun shana lai wa ai lam hta, Monsignor John Putzer kawn shinggyim ahkaw ahkang hte seng ai lam mung dan shagu na malawm ni yawng hpe Migrants (bu htawt sit hkawm nga ai masha ni) a matu matut nna myit hkrum ai hte myit mang langai sha hte shanhte (migrants) ni a prat hpe grau kaja ai hku hkawm sa lu na matu rau sha gwi gwi shakut sa wa na lam hpe tsun shana saw shaga lai wa ai.

Lai wa sai Bat langai ya shani Geneve hta galaw lai wa sai United Nation Human Right Council zuphpawng hta Holy see Wa Sarabyin a gawng malai hku na shang lawm ai Monsignor John Putzer hku nna Migrants (htawt sit ra nga ai ni) hkrum sha nga ai mayak mahkak lam ni hte seng nna tsun shana lai wa ai.

Matut nna anhte ni sung sung myit yu ra nga ai lam gaw bu htawt sit hkawm nga ai ni (migration) hpe shim lum ai hte htawt sit nga sa lu na lam hte galoi mung shamu shamawt htawt sit mai na lam ni hpe anhte yawng ta tut lit la galaw sa wa ra lam mung tsun lai wa ai.

Msgn. Putzer gaw Wa Sarabyin a sasana hta tut nawng masam maram ai wa sumtsan salang rung litkam (Holy see na Charge’d affairs of the Permanent Observe Mission) hku nna Geneva kaw nga ai UN ni hpe Migrants (htawt sit ra nga ai ni) a hkrum sha nga ai mayak mahkak lam  ni hpe madi madun lai wa ai.

Htawt sit hkrum ai masha ni law malawng shanhte hkum shanhte yak hkak ai hkrun lam hpe lata la ra wa ai ten hta kalang marang jam jau kaba hkrum ai zawn myit shut ai lam ni the myit n dingman ai masha ni a dut sha hkrum ai masha ni zawn, byin hkrum chye nga ma ai.

Wa sarabyin Francis tsun ai ga hpe la kap nna htawt sit hkrum nga ai ni a prat hpe manu shadan hkungga na hte makawp maga ya ra ai lam tsun lai wa ai. Migrants (htawt sit hkrum nga ai ni) hpe nga taw nga ai jahpan hku sha nrai, shanhte hpe mung anhte a kahpu kanau ni zawn, nta masha langai zawn bai nna Karai Kasang a kashu kasha ni mung rai nga ai hpe chye myit la ra nga ai hpe aja wa tsun lai wa sai.

Msgr. Putzer kawn mung daw kata nga ai wuhpung wuhpawng ni hpe Migrants(htawt sit hkrum ai ni) hpe garan gin hka ai lam n galaw ai sha hkap tau la na lam, makawp maga na lam, gaw sharawt na lam ni hte kahkyin gumdin la na lam ni hpe mung galaw sa wa na matu tsun shadum ngun jaw lai wa ai.

Matut nna mung Global Compact kawn na htawt sit na lam hte seng nna shim lum ai hte galoi htawt sit lu na lam hpe mung tara shang galaw lu na matu n-gun dat ra ai lam aja wa tang madun tsun shana lai wa ai. Ya na zawn htawt sit ai lam hta galoi mung htawt sit nga na lam ni hte shara nnan lajang jaw ai lam ni hte hpaji lam, bungli jaw ya ai lam ni, ra mara hte ra rawng ai lam ni yawng hpe rawt jat galu kaba wa hkra galaw ra ai lam ni lawm nga ai.

Shi a ga hpe UN na zuphpawng hta htawt sit hkrum nga ai ni hpe garum na gaw Mungkan ting hta lit nga ai hte garan nna lit la sa wa na lam shadum ai ga hte hpungdim dat ai tsun lai wa ai lam chye lu ai. Msgr. Putzer kawn international communities ( mungdan ga daga the seng ai uhpung ni ) hpe n gup ga hte sha nrai ta tut galaw sa wa na lam hte  mungkan ting hta htawt sit hkrum nga ai masha marai hkum ngau shagu hpe tsawra myit, rap ra lam ni, hkungga ai lam hte shanhte hta ra rawng ai lam ni hte shanhte a lu ang ai ah hkaw ah hkang ni hpe jaw ya na lam hpe aja wa n-gun jaw tsun shana lai wa ai.

Holy See a gawng malai wa ya na zawn tang madun ai lam gaw mungkan ting hta nga ai Migrants (htawt sit hkrum nga ai ) ni a sari hpe makawp maga ai hte rap ra ai hku woi awn sa wa na lam hta Mungkan ting shang lawm galaw shakut sa wa na hpe kam hpa myit mada ai shiga rai nga ai.