UN: HIV/AIDS Ana Zingli 2030 Shaning Hta Htum Myit Mat Masin Jahkrat Dat Ai Shiga

“The United Nations General Assembly” kawn June 8, bat lahkawng ya shani, AIDS ana zingli 2030 shaning laman htum myit mat masin hpe ndau lam langai galaw da ma ai lam Vatican Shiga Dap kaw nna,June 9 ya shani ndau da ya ma ai.

Chyam bra ana zingli tsin-yam kaba hkum hkra nga ai ten, AIDS ana zingli hte seng nna tsi lajang jep joi ai lam ni mung matut nga taw ai majaw, UN kawn ya na zawn ndau ai rai nga ai.

Lai wa sai shaning 40 laman hta ana kap masha wan 77.5 rai mat sai lam, dai ni hta na ana kap masha wan 35 daram si mat sai lam, HIV hte AIDS ana hkoi tsi ya du hkra n lu shapraw si ai lam mung chye lu ai.

Shaning shagu HIV/AIDS ana kap masha shayawm lu na yaw shada let mungdan shagu na dakkasa 193 shang lawm ai zup hpawng hta laika man 18 rawng ai sang lang ndau ai lam hpe mung galaw da ai.

HIV/AIDS  hte seng ai “The high-level General Assembly” zup hpawng hpe June 8-10 ya laman galaw ma ai rai nna zup hpawng lawm masha 165 gaw masin hpe hkap la myit hkrum ma ai; marai mali (4) gaw dai ndau ai lam hpe n galaw na matu ninghkap ma ai lam mung chye lu ai.

HIV/AIDS ana kanu kap hpang ai lam hpe 1981, June 5 ya shani, US kaw marai manga hpe jep mu ai aten kaw nna Tsi Rung kawn tara shang ndau hpang ai re lam mung chye lu ai.

Ya ten du hkra HIV/AIDS ana sat tsi n mu tam shi ai raitim, dai ana kanu kap tim, asak galu sak hkrung lu ai tsi hpe gaw htuk shapraw jai lang lu nga sai gaw rai nga ai.

UNAIDS a Executive Director, Winnie Byanyima gaw chyam bra ana AIDS ana zingli htum myit mat na lam ndau ai hpe hkap la ai hte, “dai gaw shaning mali shi (40) ning anhte shinggyim wuhpawng hpe jahten taw ai rai nna, dai hpe htum myit mat hkra bungli rau jawm galaw na npawt gaw da lam mung rai nga ai,” ngu tsun da nga ai.

The General Assembly ndau ai hta, 2001 shaning kaw nna AIDS hte si ai masha tsa shadang 54% hpe shayawm kau lu sai lam, HIV ana kap masha tsa shadang 37% shayawm kau lu ai lam ni mung lawm nga ai.

Mungkan masha ni yawng ndai HIV/AIDS ana zingli hpe gasat shamyit kau lu na matu tut nawng gasat nga ra ai; pu ba lam ni nga tim matut manoi gasat nga ra ai ngu Byanyima n-gun jaw da nga ai.

Anhte mungdan langai, shing n rai Dan langai kaw HIV/AIDS ana hpe shamyit kau ai hte sha n-ngut ai; mungkan shara shagu hta dai ana hkoi myit mat hkra galaw ra ai ngu mung shadum da nga ai.

Vatican Shiga Dap kaw kaw nna ndau da ma ai.

By Fr. Patrick Hkawng Yae

#vaticannews

#rvakachinservice

https://www.vaticannews.va/en/world/news/2021-06/un-general-assembly-declaration-hiv-aids-end-by-2030.html