Ukraine Mungdan Simsa Lam A Matu Sasana Ma Ni Hpe Rosary Hti Akyu Hpyi Ap Nawng Ga Nga Nna Wa Sarabyin Saw Shaga Ai

Wa Sarabyin: Ukraine Mungdan Simsa Lam A Matu Sasana Ma Ni Rosary Hti Akyu Hpyi Ap Nawng Ga

 Ukraine mungdan simsa wa u ga hte majan tsin-yam hkrum hkra nga ai shara shagu simsa wa u ga matu, mungkan ting na sasana ma ni, bat lahkawng ya shani, Rosary hti akyu hpyi ap nawng ya nga na hpe Wa Sarabyin Francis. Oct 16, laban shani, hpyi shawn da ai.

 Wan hku re ai Sasana ma ni a Rosary hti akyu hpyi nsen gaw, October 18, bat lahkawng ya shani, nihtep ai sasana ma ni rau hpawng de akyu hpyi nga na hpe kam ai nga nna Wa Sarabyin myit mada da ai lam tsun da ai.

 Shaning shagu Rosary hti akyu hpyi na matu The Pontifical Foundation Aid to the Church in Need (ACN) kawn lamang galaw hkyen lajang woi awn ya ai rai nga ai. Dai gaw, Jau Ginwang shagu, hpaji jawng ni, kun dinghku masha ni simsa lam a matu yaw shada let Rosary hti akyu hpyi ai lamang rai nga ai.

 Daining gaw Ukraine hte yak hkak jam jau nga ai shara ni hta simsa lam lu u ga akyu hpyi ya nga na matu Wa Sarabyin, laban shani, Madu a Lamu Kasa Akyu hpyi Ga tsun ten, ndau shana saw shaga da ai rai nga ai.

 Anhte a mungkan simsa lam a matu sasana ma ni akyu hpyi ai hta sak ram sai ni yawng mung shang lawm akyu hpyi lawm ga nga nna mung Wa Sarabyin saw shaga da ai.

 "Masha hkum shagu gaw shinggyim wuhpawng a matu lata ladawn ya nga ga, hpa majaw nga yang shanhte ni gaw matsan mayan rai ma ai, nga nna mung Wa Sarabyin tsun shana da ai.

 Karai Kasang gaw anhte hpe garum ya nga na ra ai; anhte a mungkan hpe yu reng makawp maga ya nga na ra ai; raitimung, anhte hkum nan mung ra kadawn ai ni kaw du hkra sa nna garum ya ra na ga ai, nga nna Cardinal Mauro Piacemza, the president of ACN mung, Wa Sarabyin a ga hpe madi shadaw let anhte hpe shadum jahprang n-gun jaw saw shaga da ai.

Source: Vatican News

By Fr. Patrick Gawmaw Hkawng Yae

#vaticannews

#rvakachinservice